વિમાનપ્રવાસીઓને ગભરાવતી મુસીબત

ઍર ટર્બ્યુલન્સ હમણાં હમણાં ઉપરાઉપરી બે ફ્લાઈટ ભારે આંચકા સાથે હજારો ફૂટ નીચે આવી ગઈ ત્યારે મુસાફરોના શ્વાસ અધ્ધર થયા અને વાતાવરણમાં જે ફેરફાર થઈ રહ્યા છે એ તો સૂચવે છે કે હવે આવી ઘટના વધતી જ રહેવાની.

- ઉમંગ વોરા

This Flight is going through turbulence અથવા યે હવાઈ જહાજ ટર્બ્યુલન્સ યે સે ગુજર રહા હૈ...

વિમાનપ્રવાસ કરતી વખતે આવી સૂચના તમે ક્યારેય સાંભળી છે? આ ટર્બ્યુલન્સ એટલે શું? એ વખતે શું થાય છે?

આ તો જેણે અનુભવ કર્યો હોય એને જ ખબર પડે, ભાઈ. વિમાનપ્રવાસ વખતની આ એક એવી ડરામણી, ભયાનક ઘટના હોય છે, જેને કારણે હમણાં નિયમિત હવાઈ મુસાફરી કરનારા લોકોમાં ચિંતા ફેલાઈ છે.

અવારનવાર વિમાન મુસાફરી કરતા લોકોને કદાચ એકાદ વાર તો હળવા કે મધ્યમ પ્રકારનાં ઍર ટર્બ્યુલન્સનો સામનો કરવો પડ્યો જ હશે. જો કે આ જ મહિને એક જ અઠવાડિયામાં બે વખત ટર્બ્યુલન્સની બનેલી બે ગંભીર ઘટનાએ લોકોને ખૂબ ડરાવી મૂક્યા છે.

પહેલી ઘટના બની હતી ૨૧ મેએ, સિંગાપોર ઍરવેઝની લંડનથી સિંગાપોર જઈ રહેલી ફ્લાઈટ SQ321ને. આ વિમાન આપણા આંદામાન ટાપુઓ પરના આકાશમાં હતું ત્યારે અચાનક એ ઍર ટર્બ્યુલન્સમાં ફસાયું અને ગણતરીની ક્ષણોમાં એક પછી એક આંચકા સાથે ૬૦૦૦ ફીટ નીચે આવી ગયું. વિચારો, આવી હાલત થાય ત્યારે પ્રવાસીઓના તો જીવ તાળવે જ ચોંટી જાય ને?

જો કે કેટલાક મુસાફરોએ વિમાનની એ વખતની ગતિવિધિના ફોટોગ્રાફ્સ અને વિડિયો લીધા, જે દર્શાવે છે કે વિમાન જે ઝપાટાભેર નીચે આવી રહ્યું હતું એમાં લગેજ ટ્રૅક પરથી ઘણો સમાન નીચે પડતો હતો, અમુક સીટ પરની ઑક્સિજન માસ્ક સાથેની આખી પ્લેટ જ તૂટીને લટકતી હતી. વિમાનની અંદર હવાના દબાણમાં એટલો તીવ્ર ફેરફાર થઈ રહ્યો હતો કે બધું અહીંથી ત્યાં ફેંકાતું હતું. અરે, સીટ બેલ્ટ બાંધ્યો નહોતો એવા પેસેન્જર્સ સુદ્ધાં રીતસર ઊછળતા હતા!

પ્લેન આટલું ફસડાયા પછી પાઈલટે કોઈક રીતે સ્થિતિ પર કન્ટ્રોલ મેળવ્યો. જો કે ત્યાં સુધીમાં ત્રીસેક મુસાફરો ઈજાગ્રસ્ત થયા હતા અને ૭૩ વર્ષના એક બ્રિટિશ નાગરિક હ્રદયરોગનો હુમલો આવતાં મૃત્યુ પામ્યા હતા. એ પછી તો વિમાનને સિંગાપોર સુધી લઈ જવાને બદલે થાઈલૅન્ડના બેંગકોક ઍરપોર્ટ પર ઈમર્જન્સી લૅન્ડિંગ કરાવવામાં આવ્યું અને ઈજાગ્રસ્ત પ્રવાસીઓને સારવાર આપવામાં આવી.

બીજી ઘટના હતી ૨૬ મેની, જેમાં કતાર અરવેઝની દોહાથી આયરલૅન્ડના ડબ્લિન જતી ફ્લાઈટ ટર્બ્યુલન્સનો શિકાર બની. વિમાન જ્યારે તુર્કીના આકાશ પરથી પસાર થતું હતું ત્યારે એ ટર્બ્યુલન્સમાં સપડાયું. ડબ્લિન ઍરપોર્ટ પર લૅન્ડ થયા બાદ છ ક્રૂ સભ્યો અને છ પ્રવાસીઓને મેડિકલ સારવાર આપવી પડી.