શરીફની શરીફાઈ ભારત-પાક સંબંધ સુધારી શકશે?

અટલ બિહારી વાજપેયી અને નરેન્દ્ર મોદી સાથેના ‘શાંતિ કરાર’ પાકિસ્તાની લશ્કરે સફળ ન થવા દીધા એ પછી હવે નવેસરથી નવાઝ શરીફે ભારત તરફનો દોસ્તીનો દરવાજો ખોલવા હિલચાલ આદરી છે.

- હીરેન મહેતા

ડુબતો માણસ તરણું ઝાલે એમ પાકિસ્તાનના ભૂતપૂર્વ વડા પ્રધાન નવાઝ શરીફે ભારત તરફ મૈત્રીનો હાથ લંબાવ્યો છે. આમ તો નવાઝ શરીફ સત્તાવાર રીતે અત્યારે પાકિસ્તાનમાં કોઈ બંધારણીય હોદ્દો ધરાવતા નથી, પરંતુ શાસક પક્ષ પાકિસ્તાન મુસ્લિમ લીગના પ્રમુખ તરીકે હમણાં એ ફરી ચૂંટાયા છે અને એમના ભાઈ શેહબાઝ શરીફ વડા પ્રધાન હોવા છતાં એક લોકનેતા તરીકે નવાઝ અત્યારે વધુ સત્તા ભોગવે છે.

પાકિસ્તાનના રાજકીય આગેવાનોની તાસીર રહી છે કે લશ્કરની કાખઘોડી પકડી એ સત્તા મેળવે અને પછી પોતાની સર્વોપરિતા દેખાડવા લશ્કર સામે માથું ઊંચકે. બેનઝીર ભુટ્ટો હોય કે ઈમરાન ખાન કે પછી નવાઝ શરીફ, બધાં આ ખેલ કરી ચૂક્યાં છે. નવાઝ તો ત્રણ વાર વડા પ્રધાન બન્યા, પણ પાકિસ્તાનની માથાભારે લશ્કરી નેતાગીરી સામે એમનું કંઈ ઊપજ્યું નહીં અને એક તબક્કે તો એમણે જીવ બચાવવા દેશવટો સ્વીકારવો પડેલો. જો કે ઈમરાન ખાનને પદભ્રષ્ટ કરી પાકિસ્તાનના વડા પ્રધાનપદે એમના સ્થાને શેહબાઝ શરીફને બેસાડવામાં આવ્યા એ પછી નવાઝનો પાકિસ્તાન વાપસીનો માર્ગ ખુલ્લો થયો.

અટલ બિહારી વાજપેયી અને નરેન્દ્ર મોદી સાથે નવાઝ શરીફ દોસ્તીને કેટલા મોકા આપવાના?