હું છું સાઉથ ગુજરાતનો સૌથી સુંદર ડોન

પ્રકૃતિએ અહીં ઠાંસીઠાંસીને સૌંદર્ય વેર્યું છે. સાપુતારા કરતાંય વધુ ઊંચાઈ અને ચારેકોર હરિયાળી. એની વચ્ચેથી તોફાની નદીની જેમ વહી જતા રસ્તા અને ડુંગરા વચાળે બે ધોધ. છોગામાં, આકાશદર્શન માટે આદર્શ વાતાવરણ... ચોમાસામાં અહીં દોડી આવતાં હવે તમને શું રોકે છે?

- અરવિંદ ગોંડલિયા (સુરત)

ડૉન કા ઈંતેજાર તો ગ્યારહ મુલ્ક કી પુલીસ કર રહી હૈ, લેકિન ડૉન કો પકડના મુશ્કિલ હી નહી, નામુમકીન હૈ...

લેકિન, લેકિન, લેકિન... અમે ડોનને પકડી લીધો છે. ગુજરાતની એક ઊંચી અને ખૂબસૂરત પહાડી પર એ છુપાયેલો હતો. એ એટલો સુંદર અને શાનદાર ડોન છે કે એની સામે હીરોઈનની ખૂબસૂરતી પણ ઝાંખી પડે. કહેવાય છે કે ખૂબસૂરતી જોનારની આંખોમાં હોય છે, પણ અહીં જેની આંખમાં ખૂબસૂરતી નથી એને પણ ડોન સુંદર જ દેખાશે. એની સુંદરતા નિહાળતાં આંખ થાકે જ નહીં. બસ, જોયા જ કરો...

શું તમારે પણ આ ડોનને મળવું છે? તો થઈ જાવ તૈયાર અને ચાલો, અમારી સાથે...

સુરતનું આકાશ આમ તો સ્વચ્છ છે, નભમાં સૂરજદાદા હળવા મૂડમાં છે. ક્યારેક ક્યારેક કોઈ કાળું વાદળું આવીને સૂરજદાદાને હાઈ-હેલ્લો કરી જાય છે. દૂરથી કાળાંડિબાંગ વાદળોની એક પલટન સુરત તરફ કૂચ કરી રહી હોય એવું લાગે છે. સુરતની હવામાં સહેજ ભેજ છે. શીતળ વાયરો વહી રહ્યો છે અને એ વાયરાને ચીરીને અમારી કારનાં પૈડાં સુરતને ધીરે ધીરે પાછળ છોડી રહ્યાં છે. સુરતથી પલસાણા, નવસારી, વાંસદા વટાવીને વઘઈ-આહવાના રળિયામણા માર્ગે અમે જઈ રહ્યા છીએ.

વઘઈથી આહવાનો આ માર્ગ બહુ મનમોહક છે. વાંકાચૂકા સાપના લિસોટા જેવા લીલાછમ રસ્તા પર દોડતાં દોડતાં કાર હવે ડોનની નજીક છે. જો કે ૯૦ના દાયકાની ફિલ્મોમાં ડૉનના અડ્ડાઓ સુધી પહોંચવા હીરોને કેવી મહેનત કરવી પડતી, યાદ છે ને? હવે આ ડોનને મળવા માટે પણ થોડી મહેનત તો કરવી જ પડશે.

અને આ તો જુઓ... ખુદ ગીધરાજ પાંખો ફેલાવીને તમારું સ્વાગત કરી રહ્યા છે. આ સુંદર પ્રવેશદ્વારમાં પ્રવેશ કર્યા બાદ હવે ખરી સફર શરૂ થશે. સરપટ ઊંચો પહાડ અને વાંકાચૂકા રસ્તા. એક તરફ પહાડ તો બીજી બાજુ ઊંડી ખીણ. દૂર દૂર સુધી નજર પહોંચે ત્યાં સુધી ડુંગરા દેખાય. નજારો તો અદ્ભુત, પણ કાર ચલાવવામાં તકેદારી પણ એટલી જ રાખવી પડે. નજર ચૂક્યા તો... ખેર, પાંચેક કિલોમીટરના આ સંઘર્ષ પછી હવે તમે જ્યાં ઊભા છો એ જ તો છેઃ ડોન. ડોન હિલ સ્ટેશન.

એક તરફ પહાડ, બીજી બાજુ ઊંડી ખીણ... એની વચ્ચેથી વાંકાચૂકા સાપના લિસોટા જેવા લીલાછમ રસ્તે થઈને પહોંચાય ડોન ગામ.