હવે પડશે દ્વારકાનો વટ...

પ્રાચીન મંદિરોમાં યાત્રાળુઓને વધુ મોકળાશ, વધુ સુવિધા, વધુ આરામ મળી રહે એ હેતુથી કાશી, મહાકાલ અને અયોધ્યાના કોરિડોર બન્યા છે. એ જ ધોરણે ગુજરાત સરકારે દ્વારકા અને બેટ દ્વારકાની કાયાપલટ કરવાનું આયોજન કર્યું છે. આગામી સમયમાં દ્વારકાધીશની નગરી કદાચ આપણે ઓળખી ન શકીએ એવી બની જાય.

- પાર્થ સુખપરિયા (જામનગર)

સાતમ-આઠમ, મેળા, જન્માષ્ટમી,નંદોત્સવની ઉજવણીનો કેફ હજી ઊતર્યો નથી ત્યારે સમાચાર આવ્યા છે કે ભવ્ય સુદર્શન સેતુના નિર્માણથી બેટ દ્વારકાને જમીનમાર્ગે જોડ્યા બાદ આ તીર્થસ્થળ તેમ જ આસ્થાની સાથે પૌરાણિક માહાત્મ્ય ધરાવતી ભગવાન શ્રીકૃષ્ણની પ્રસિદ્ધ નગરીની વૈશ્વિક સ્તરની કાયાપલટ કરવા રાજ્ય સરકારના પ્રવાસન નિગમે ભગીરથ આયોજન હાથ ધર્યું છે.

સુદર્શન સેતુ શરૂ થયા બાદ દ્વારકાના યાત્રાળુઓની સંખ્યામાં નોંધપાત્ર વધારો થયો છે. રાજ્યના પ્રવાસનમંત્રી મુળુભાઈ બેરા કહે છે એમ, દ્વારકાના વિકાસ માટે ગુજરાત પ્રવાસન નિગમ દ્વારા ત્રણ તબક્કાનો માસ્ટર પ્લાન તૈયાર કરવામાં આવ્યો છે. પ્રથમ તબક્કામાં મંદિર પરિસર, બીચ અને આસપાસના વિસ્તારોને ડેવલપ કરવામાં આવશે, જેના માટે ૧૫૦ કરોડ રૂપિયા ફાળવવામાં આવ્યા છે. હાલ ટેન્ડરિંગની પ્રક્રિયા ચાલી રહી છે.

મુળુભાઈ બેરા ઉમેરે છે કે વડા પ્રધાન નરેન્દ્ર મોદીના માર્ગદર્શનમાં તેમ જ મુખ્ય મંત્રી ભૂપેન્દ્ર પટેલના નેતૃત્વમાં ગુજરાતમાં અનેક ધાર્મિક અને ઐતિહાસિક સ્થળો તથા પ્રવાસધામોને પ્રવાસીઓની સુવિધા માટે કરોડોના ખર્ચે વિકસાવવામાં આવી રહ્યાં છે.