પ્રકૃતિ વચાળે તાજગીનો શ્વાસ લેવા નીકળો છો ને?

મેઘરાજાએ હેત વરસાવ્યા બાદ સૌરાષ્ટ્ર-ગુજરાતના ગ્રામ્યવિસ્તારમાં પ્રકૃતિ સોળે કળાએ ખીલી ઊઠી છે. ધરતીએ લીલીછમ ચાદર ઓઢી હોય એવું દૃશ્ય હરકોઈનું મન મોહી લે છે ત્યારે કૉન્ક્રીટનાં જંગલોથી દૂર જઈને પ્રકૃતિના ખોળે રમવા વધુ ને વધુ લોકો બહાર નીકળી રહ્યા છે.

- દેવેન્દ્ર જાની (રાજકોટ)

શનિ-રવિ આવે એટલે ઘરની બહાર નીકળી જનારા લોકોની સંખ્યા વધી રહી છે. એમાંય આગળ-પાછળ એકાદ રજા આવી તો વચ્ચે એક ખાડો લઈ મિની વૅકેશન બેને બદલે ચાર દિવસ સુધી લંબાવી ક્યાં નથી શકાતું? કોરોનાની આપત્તિએ માનવીને પ્રકૃતિની મહત્તા વિશે બરોબરનો પાઠ ભણાવી દીધો છે. ઑક્સિજનનો એક બાટલો મેળવવા કેવી દોડધામ કરવી પડતી હતી એ દિવસો લોકો હજી ભૂલ્યા નથી.

આ જ કારણે કૉન્ક્રીટનાં જંગલથી બહાર નીકળી પ્રકૃતિનો આનંદ માણવાની વૃત્તિ હમણાં બહુ વધી છે. અગાઉ પણ શ્રાવણ-ભાદરવા મહિનાના તહેવારોની રજામાં કુદરતના ખોળે જનારા લોકોનો એક વર્ગ હતો જ. હવે લોકો પાસે અગાઉ કરતાં વધારે પૈસા આવતા થયા છે અને સામાજિક વ્યવહાર ઓછા થયા છે. સરવાળે ઘણા પરિવાર આવી છુટ્ટી પાછળ ખર્ચ કરી શકે છે અને કરે પણ છે.

લીલાછમ ડુંરાને ચીતા રસ્તા પર સફરની મજા જ કંઈક ઔર છે. આ અનુભવ કરવો હોય તો બસ, નીકળી પડો...

અષાઢ અને શ્રાવણ એ વરસાદના બે મુખ્ય મહિના પૂરા થવામાં છે. સારા વરસાદથી સૌરાષ્ટ્ર-ગુજરાતનાં મોટા ભાગનાં જળાશયો નવી જળરાશિથી છલોછલ છે, નદીઓ ખળખળ વહી રહી છે, ખેતરોમાં પાક લહેરાઈ રહ્યો છે. એકંદરે આકરી ગરમી બાદ હવે મનને ઠંડક થાય એવું વાતાવરણ જોવા મળી રહ્યું છે અને એ મસ્ત વાતાવરણનો આનંદ માણવા લોકો ઊમટી રહ્યા છે.

સૌરાષ્ટ્ર-ગુજરાતના મોટા ભાગના વિસ્તારોમાં ધમાકેદાર વરસાદને કારણે હરિયાળી છવાઈ ગઈ છે અને એની વચ્ચેથી વહેતી નદીઓ બે કાંઠે છલકાઈ રહી છે. પછી તો લોકો ઘરમાં કેમ પુરાઈ રહે?

સૌરાષ્ટ્રની વાત કરીએ તો યુવાનો હવે ટ્રેકિંગ માટે કેરળ કે સિક્કિમ સુધી જવાને બદલે સાપુતારા, નર્મદા જિલ્લો, બરડો ડુંગર, ગિરનારના ડુંગર, હિંગોળગઢ (જસદણ), ઓસમ ડુંગર (રાજકોટ જિલ્લો-ધોરાજી પાસે) સહિતનાં સ્થળ પસંદ કરી રહ્યા છે. આવવા-જવા માટે વધુ દિવસોનું પ્લાનિંગ ન કરવું પડે અને પ્રકૃતિનો ખરો આનંદ માણી શકાય એ માટે ગુજરાતીઓ આ સ્થળો વધુ પસંદ કરી રહ્યા છે. એમ તો છેલ્લાં ત્રણેક વર્ષથી મધ્ય અને દક્ષિણ ગુજરાતના આદિવાસી વિસ્તારોમાં પણ ટ્રેકિંગ અને ફૅમિલી નૅચર કૅમ્પ વધુ થઈ રહ્યાં છે.