આશા રાખીએ, કોઈ વડીલ માટે આવી નોબત ન આવે...

પાછલી જિંદગીમાં સાવ એકલા રહેવાનું... ને મરી જાય ત્યારે અંતિમવિધિ પણ પારકાના હાથે થાય!

- ડૉ. મિતાલી સમોવા

પરિવારમાં સમજદાર–ઉંમરલાયક વડીલોની હાજરી માથે છત જેવી હોતી હોય છે. એમાં પણ ભારત જેવા પરંપરાગત પરિવારવ્યવસ્થામાં માનતા દેશમાં વડીલોને વિશેષ બહુમાન મળેલું છે. ભારતની સંયુક્ત પરિવારવ્યવસ્થા તો બાળકથી લઈને વડીલો સુધી પરિવારના બધા સદસ્યોની કાળજી લેવાય એ માટે અને એ રીતે બની છે એમ કહીએ તો નવાઈ નહીં. જો કે બદલાતા યુગ સાથે સમાજવ્યવસ્થા બદલાતી હોય છે અને ક્યારેક એને અનુકૂળતા સાધવા જતાં નવી સમસ્યા પણ ઉદ્ભવતી હોય છે. છેલ્લા થોડા દાયકામાં ઉદ્ભવેલી એવી એક સમસ્યા છે વડીલોના ભાગે સાવ પાછલી ઉંમરમાં આવતું એકાકી જીવન. એમાંય ક્યારેક તો હાલત એવી ખરાબ હોય કે એકલા રહેતા વડીલ મૃત્યુ પામે ત્યારે કોઈ અજાણ્યાએ એમના અંતિમ સંસ્કાર કરવાના આવે.