હેલ્થ ઈન્સ્યોરન્સના પ્રીમિયમ પર જીએસટીઃ આ ‘વ્યાધિ’ દૂર કરો!

લાઈફ અને હેલ્થ ઈન્સ્યોરન્સ પૉલિસીના પ્રીમિયમ પરનો ઊંચો જીએસટી નાબૂદ કરવાની અથવા એમાં નોંધપાત્ર ઘટાડો કરવાની માગણી થઈ રહી છે. અત્યારે તો આ મામલો નવેમ્બર સુધી લંબાવી દેવાયો છે, પણ મધ્યમ વર્ગ અને ખાસ તો વરિષ્ઠ નાગરિકોને રાહત આપવા આ પગલું ભરવામાં વિલંબ થવો જોઈએ નહીં.

- જયેશ ચિતલિયા

તમારી પાસે હેલ્થ ઈન્સ્યોરન્સ છે? લાઈફ ઈન્સ્યોરન્સ તો હશે તે અત્યારના સમયમાં આમ પણ આ બન્ને અનિવાર્ય થઈ ગયા છે. વ્યક્તિ ભારેખમ મેડિકલ ખર્ચથી બચવા અથવા એમાં રાહત મેળવવા વીમા યોજનામાં ભાગ લે છે તેમ જ પોતાના પરિવારની આર્થિક સલામતી કે રક્ષા માટે લાઈફ ઈન્સ્યોરન્સ કઢાવે છે.

ભવિષ્યની જોગવાઈ તથા આર્થિક સલામતીને ધ્યાનમાં રાખી એણે આ બોજ નિયમિત પ્રીમિયમ ભરીને ઉઠાવવો પડે છે. આ બોજ પર સરકારે લાંબા સમયથી બીજો એક બોજ જીએસટી (ગુડ્સ ઍન્ડ સર્વિસ ટૅક્સ)ના નામે નાખી દીધો છે, એ પણ ૧૮ ટકા જેવો ઊંચો! અત્યારે આ બોજ હટાવવા કે એનો વેરાદર ઓછો કરવા દબાણ થઈ રહ્યું છે ત્યારે સરકાર હસ્તકની જીએસટી કાઉન્સિલ એમ કરવામાં સત્તર વિચાર કરી રહી છે. ખરેખર તો હેલ્થ ઈન્સ્યોરન્સ જેવી સ્કીમ પર આટલો ઊંચો કરબોજ હોવો જ ન જોઈએ અને જ્યારે એ મધ્યમ વર્ગની કમર તોડી રહ્યો છે ત્યારે સરકારે એનો નિર્ણય ઝડપથી લેવો જોઈએ એને બદલે સરકાર પોતાને ટૅક્સની આવકમાં કેટલો અને કેવો ફરક પડશે એની ગણતરી કરવા બેસી સમયને વધુ આગળ ખેંચી રહી છે.

વોટ બૅન્ક માટે સરકાર રાહત આપવા રાજી રાજી

અગાઉ જે મર્યાદિત વર્ગના વરિષ્ઠો માટે હતી એ આયુષ્માન ભારત યોજના કેન્દ્ર સરકારે હવે ૭૦ વર્ષની વય ઉપરના દેશના તમામ વરિષ્ઠ નાગરિકો માટે અમલમાં મૂકવાનો નિર્ણય જાહેર કર્યો છે. એ અંતર્ગત વ્યક્તિદીઠ પાંચ લાખ રૂપિયાની જોગવાઈ છે. એ પહેલાં મહારાષ્ટ્ર સરકારે મધ્ય પ્રદેશની જેમ લાડકી બહેનના નામે એક સ્કીમ જાહેર કરી ગરીબ વર્ગની તમામ યુવતીને ૧૫૦૦ રૂપિયા એના બૅન્ક એકાઉન્ટમાં જમા કરવાની શરૂઆત કરી છે. વિવિધ રાજ્ય સરકારો વોટ બૅન્ક બનાવવા યા મજબૂત કરવા આવી લહાણી કરતી રહે છે. આમાં બધા જ રાજકીય પક્ષો આવી જાય છે. કોઈ પાણી અને વીજળી મફત આપે છે તો કોઈ અનાજ. કોઈ લોન માફ કરે છે તો કોઈ બીજી રીતે સરકારી તિજોરીનાં નાણાં લુટાવે છે.