પ્રશંસા અને ટીકાની વચ્ચે

જીવનમાં કેટલું હજી કરવાનું બાકી છે દુનિયાની દાદ કે ટીકા માટે વખત નથી.

- હિતેન આનંદપરા

બીજાનાં અભિપ્રાય અને મંતવ્ય પ્રમાણે આપણી જિંદગી ઘડાતી હોય ત્યારે એક તબક્કે વિચાર કરવો પડે. સમજણ પૂરી વિકસી ન હોય એવી અવસ્થામાં સાચા-ખોટાની સમજ આપણે વડીલો પાસેથી મેળવીએ છીએ. યુવાની પછી પણ સમજણ કેળવાઈ ન હોય તો અનુભવીનું માર્ગદર્શન આવશ્યક બને છે. એક સમસ્યા એના પછી શરૂ થાય છે. સમજણનું નિશ્ચિત સ્તર હાંસલ કર્યા પછી પણ અન્ય કોઈનું મંતવ્ય આપણા માનસને ખંડિત કરતું હોય ત્યારે સમજણમાં લાચારી ભળતી જાય.