ઘડપણનું ઘર આવે તો જુવાનીએ શીદ પાછા વળવું?

ઉંમર સૌની વધવાની છે, વૃદ્ધાવસ્થા સૌની આવવાની છે, પણ એ આવશે અથવા આવી ગઈ એવા ભયના ઓથાર હેઠળ શું કામ જીવવું, ભલા?

- કેતન મિસ્ત્રી

ઉત્તર પ્રદેશની રાજધાની કાનપુર. એક દિવસ શહેરની મહિલાઓમાં, ખાસ તો રૂપ નીતરતો ચહેરો ને ઝગારા મારતી ત્વચા પામવાનાં અરમાન રાખતી આધેડ વયની મહિલાઓમાં ખળભળાટ મચી જાય છે. શહેરના હાર્દ સમા વિસ્તારમાં રિવાઈવલ નામનું એક બ્યુટી સેન્ટર ખૂલ્યું છે, જેના માલિકોના કહેવા મુજબ, અહીં આપવામાં આવતી ટ્રીટમેન્ટનાં મશીન અમે ઈઝરાયલથી મગાવ્યાં છે. આ ચમત્કારિક ઈમ્પોર્ટેડ મશીનની મદદથી તમે ૬૦ વર્ષની વયે પચ્ચીસના દેખાઈ શકો એવો સેન્ટરનાં માલિક, જુવાન દંપતી રશ્મિ અને રાજીવ દુબેનો દાવો હતો. પચપનમાં બચપન જેવા દેખાવાનાં છ હજારથી લઈને નેવું હજાર રૂપિયાનાં પૅકેજ આપવામાં આવ્યાં. ઉંમર કેટલી ઘટાડવી છે, કેટલી સેશન લેવી છે એના આધારે પૈસા લેવામાં આવ્યા. આવાં બ્યુટી પૅકેજ, ટ્રીટમેન્ટ લેવા માટે રીતસરનો ધસારો થયો.

હેમા માલિની અને રેખા ગણેશન્ સિત્તેર વટાવી ગયેલાં લોકો કોઈ પણ વયજૂથના મુકાબલે સૌથી વધારે રાજી રહેતાં હોય છે, પણ...

થેરાપી શરૂ થઈ ગઈ, પણ સબૂર. આ શું? મહિનાઓ સુધી થેરાપી લીધા પછી પણ ઉંમરમાં કંઈ ઘટાડો થયો નહીં. ચહેરો, લબડી ગયેલી ચામડી, વગેરે બધું જેમ ને તેમ હતાં. એ પછી લોકોએ બ્યુટી સેન્ટરને બદલે પોલીસસ્ટેશનનાં ચક્કર લગાવવા માંડ્યાં. રેણુ નામનાં એક મહિલાએ કહ્યું કે એમણે તો જુદી જુદી થેરાપી માટે સાડા દસ લાખ રૂપિયા આપ્યા છે. પોલીસે ફરિયાદ નોંધી તપાસ શરૂ કરી તો રશ્મિ-રાજીવ ગાયબ! રેણુબહેન જેવાં કંઈકેટલાં સ્ત્રી-પુરુષોને આશરે પચ્ચીસ કરોડ રૂપિયાનો ચૂનો ચોપડીને બન્ને વિદેશ જતાં રહ્યાં હોવાનું મનાઈ રહ્યું છે.

હવે જરા આ જુઓ...

ગયા મહિને એક અમેરિકન ફિલ્મ ધ સબ્સ્ટન્સ રિલીઝ થઈ. વાર્તાનો ટૂંકસારઃ એલિઝાબેથ સ્પાર્કલે (ડેમી મૂર) એક સેલિબ્રિટી છે. લોકપ્રિય ટીવીચૅનલ પર એની જૉબ છે. એક દિવસ એલિઝાબેથને નોકરીમાંથી કાઢી મૂકવામાં આવે છે. કારણ? હવે એની ઉંમર ઢળી રહી છે. એલિઝાબેથ નોકરી ટકાવવા મરણિયા પ્રયાસ કરે છે. એને સબ્સ્ટન્સ નામના કોઈ ભેદી, એક્સપરિમેન્ટલ ડ્રગ વિશે ખબર પડે છે. ડ્રગ બનાવનારનો દાવો છે કે એ તમને જુવાન બનાવી દેશે. યુવાની પાછી મેળવવા એલિઝાબેથ સબ્સ્ટન્સ લે છે, જે કામચલાઉ તો કામચલાઉ, એનું યંગર વર્ઝન, સ્યુ (માર્ગારેટ ક્વાલી) તૈયાર કરે છે... પણ થોડા સમય બાદ ડ્રગની સાઈડ ઈફેક્ટ થવા માંડે છે, જે ફિલ્મને હોરરની શ્રેણીમાં મૂકી આપે છે.