ભવ્ય ભૂતકાળના વારસાનું કરો જતન

મહારાષ્ટ્રના દમદાર દુર્ગ મેઘરાજાએ વિદાય સાથે વેરેલાં સૌંદર્ય સાથે મહારાષ્ટ્રના ભવ્ય કિલ્લાઓની વિરાસત જોવા માટે તૈયાર છો?

- ઉમંગ વોરા

સમૃદ્ધ ઈતિહાસ અને સંસ્કૃતિથી ઓતપ્રોત રાજ્ય મહારાષ્ટ્ર ૩૫૦થી વધુ દુર્ગ (કિલ્લા) ધરાવે છે. આ દરેક કિલ્લાની પોતાની અનોખી ગાથા છે. સ્વપ્નદષ્ટા છત્રપતિ શિવાજી મહારાજ અને એમના મરાઠા સામ્રાજ્ય દ્વારા નિર્મિત આ સ્થાપત્યની અજાયબી રાજ્યના ભવ્ય ભૂતકાળનો પુરાવો છે. તમે ઈતિહાસના શોખીન હો કે સાહસના અથવા ફક્ત મહારાષ્ટ્રના વારસાની ઝલક શોધી રહ્યા હો, આ પ્રતિષ્ઠિત કિલ્લા ચોક્કસપણે મુલાકાત લેવા માટે યોગ્ય સ્થળ છે.

એમાં પણ ચોમાસા પછી છવાયેલી હરિયાળી વચ્ચે તો આ કિલ્લા અદ્ભુત લાગે છે.

ભવિષ્યમાં કરો ભૂતકાળનો અનુભવ

*સિંધુદુર્ગ કિલ્લોઃ છત્રપતિ શિવાજી મહારાજ દ્વારા બાંધવામાં આવેલો ૧૭મી સદીનો કિલ્લો મરાઠાઓની બહાદુરીના પ્રતીક તરીકે ઊભો છે. દંતકથા સમાન રાજાને સમર્પિત એકમાત્ર મંદિર જુઓ અને મરાઠા સામ્રાજ્યના નૌકાદળના પાયાનાં રહસ્યોને ઉજાગર કરો.