લડત પતિના હત્યારાને સજા અપાવવાની...લડત પતિની નિશાનીને જનમ આપવાની...

નજર સામે પતિની હત્યા થતી જોઈ આ મહિલા ઍડ્વોકેટનો ગર્ભપાત થઈ ગયો. એ પછી એની જિંદગીમાં બે જ લક્ષ્ય હતાંઃ ગુનેગારોને જેલ અને પરિવાર આગળ વધારવા એક બાળક! ‘આઈવીએફ’ ટેક્નિકની મદદ મેળવી પતિનાં જાળવી રાખેલાં સ્પર્મથી એમણે એ શક્ય બનાવ્યું.

- ધીરુ પુરોહિત

આ વાત ફક્ત પ્રેમની નથી, પ્રેમ પછીનાં સમર્પણ અને સંઘર્ષની છે. આ વાત એક સ્ત્રીએ લીધેલા કપરા નિર્ણયની અને સ્વમાનની છે.

આ વાત આશરે દોઢ દાયકા પહેલાંની છે, પરંતુ હમણાં બહાર આવી રહી છે... અને એનું કારણ પણ છે આ સ્ત્રીની હિમ્મત.

એ સ્ત્રીનું નામ લતા કારિયા. વ્યવસાયે એ એક એડવોકેટ પછી કાયદાશાસ્ત્રમાં જ માસ્ટર્સ અને પીએચ.ડી.ની ઉપાધિ પણ મેળવી અને થોડાં વર્ષ અગાઉ જૂનાગઢની લૉ કૉલેજનાં પ્રિન્સિપાલ તરીકે નિવૃત્ત થયાં છે. અત્યારે એમના ચહેરા પર સંઘર્ષની સફળતાનો આનંદ છે. જો કે એમની સાથે વાત કરો તો આનંદ પામવા પાછળ એમણે વેઠેલી વેદનાનો અણસાર આવ્યા વગર રહે નહીં. વેદના પતિને ગુમાવવાની, વેદના બે સંતાન જન્મે એ પહેલાં એમને ખોઈ બેસવાની, વેદના ચારિત્ર્ય હનનની...

બે દિલના ઉત્કૃષ્ટ પ્રેમથી વાતનો આરંભ થાય છે. જો કે લગ્નના થોડા જ સમયમાં એ જોડીદારી ખંડિત થાય છે. યુવાન પતિની હત્યા પછી પત્ની કૃત્રિમ ગર્ભાધાન પદ્ધતિથી પતિનું બાળક તો મેળવે છે, પણ પતિના ખૂનના આરોપીઓને સજા કરાવવા એણે લાંબી કાનૂની લડત લડવી પડે છે અને એ દરમિયાન એક સ્ત્રીને હંફાવવા પુરુષજાત કેટલી નીચે ઊતરે છે એનું એક વરવું પ્રકરણ પણ એની વાતમાં ઉમેરાય છે.

વાત માંડીને કરીએ...

જૂનાગઢની યુવતી લતા કારિયા તાજી-તાજી વકીલ બની આ નગરના જાણીતા ધારાશાસ્ત્રી દિવ્યકાંત નાણાવટીના માર્ગદર્શન હેઠળ વકીલાતની પ્રેક્ટિસ શરૂ કરે છે. અમરેલી જિલ્લાના ધારીનો વતની એવો ત્વરિત જોષીપુરા નામનો યુવાન પણ દિવ્યકાંત નાણાવટીની ઑફિસમાં જુનિયરશિપ માટે જોડાય છે. લતા બી.એસસી. અને એલએલબી સુધી ભણ્યા પછી કાયદાશાસ્ત્રમાં જ માસ્ટર્સ અને પીએચ.ડી. પણ કરે છે. દિવ્યકાંતભાઈ નાણાવટીની ઑફિસમાં કામ કરતી વખતે એક કેસ સંદર્ભે એણે સાથી ઍડ્વોકેટ ત્વરિત સાથે દીવ જવાનું થાય છે. પરિચય દોસ્તીમાં પરિણમે છે, લતા અને ત્વરિત સારાં મિત્રો બની જાય છે.