દિખાવે પે મત જાઓ...

ક્રિકેટર રોહિત શર્માના દેખાવ વિશે ટિપ્પણી કરી કોંગ્રેસનાં પ્રવક્તાએ બિનજરૂરી વિવાદ ખડો કર્યો. એ જ રોહિત શર્માએ દેશને મોટી ટુર્નામેન્ટ જીતી આપી ત્યારે એમણે થૂંકેલું ગળવા જેવી નોબત આવી. સવાલ એ છે કે ક્યાં સુધી આપણે માણસને એની આવડતને બદલે એના દેખાવના આધારે મૂલવતાં રહેશું?

- હીરેન મહેતા

જીભમાં હાડકું હોતું નથી એ તો આપણે બધા જાણીએ છીએ. જો કે જેને બોલવાનું બિલકુલ ભાન ન હોય અથવા તો વાતવાતમાં જેની જબાન લસરી જતી હોય એવા માણસ માટે આપણી ભાષામાં બોલાય છે કે એની જીભને હાડકું નથી.

આપણી આસપાસ આવા કેટલાક લોકો તો હશે જ જેમના માટે આપણે આવું કહી શકીએ. જાહેર જીવનની વાત કરીએ તો, ખાસ તો રાજકારણમાં આવા નમૂનાનું પ્રમાણ દેખીતી રીતે વધારે છે. એનું એક કારણ એ છે કે ઘણા રાજકારણીઓ પોતાને સામાન્ય શિષ્ટાચાર, નિયમ અને કાયદાથી પર ગણે છે. એમને કોઈ આમન્યાનો છોછ નડતો નથી. રાજકારણમાં હોવાનો મદ એમને કોઈ શેહશરમ રાખવા પણ દેતો નથી. એમાંય વિધાનસભ્ય કે સંસદસભ્ય હોય એમને તો અનેક પ્રકારના વિશેષાધિકાર રૂપે અમર્યાદ કાયદાકીય સુરક્ષા મળે છે, જે એમને કાનૂની કાર્યવાહી સામે પણ રક્ષણ આપે છે.

શમા મોહમ્મદે છેડેલા વિવાદનો જવાબ રોહિત શર્માએ ચૅમ્પિયન્સ ટ્રૉફી જીતીને આપ્યો.

થયું છે એવું કે આ બધાને કારણે અમુક રાજકારણી તો ઉકરડો ગંધાય એટલી મલિન ભાષા બોલે છે. એમની સામાન્ય વાતચીતમાં પણ એમનો ઘમંડ અને સત્તાનો નશો ડોકાય છે. આ નશો એમને વાણી-વિવેક પણ ભૂલવાડી દે છે અને કોઈની પણ વિશે કઈ પણ બોલવાનો એમનો જન્મસિદ્ધ અધિકાર છે એવું જ એ માનવા લાગે છે.

કોંગ્રેસનાં રાષ્ટ્રીય પ્રવક્તા ડૉ. શમા મોહમ્મદે હમણાં કોઈ કારણ વગર ભારતીય ક્રિકેટ ટીમના કૅપ્ટન રોહિત શર્મા માટે અણછાજતી ટિપ્પણી કરી. એવાત અલગ છે કે ભારત ગયા રવિવારે ચૅમ્પિયન્સ ટ્રૉફી જીત્યું, પણ એ ટુર્નામેન્ટની એક મહત્ત્વની મૅચના આગલા દિવસે શમા મોહમ્મદે રોહિત શર્માને એક સરેરાશ ખેલાડીના પ્રમાણમાં જાડિયો-અદાદળો (ફૅટ) અને ટીમનો અત્યાર સુધીનો સૌથી નિસ્તેજ કર્ણધાર ગણાવ્યો. છએક વર્ષ અગાઉ શમા મોહમ્મદે ઔર એક ક્રિકેટર વિરાટ કોહલીના નિવેદન સામે પણ બિનજરૂરી ટિપ્પણ કરી વિવાદ ઊભો કર્યો હતો.

અત્યારે એક્સ (જૂનું નામ ટ્વિટર) અને ફેસબુક જેવાં સોશિયલ મિડિયા પ્લૅટફૉર્મ્સનું ચલણ બહુ વધી ગયું છે અને એ માધ્યમો પર કોંગ્રેસી પ્રવક્તા પર પસ્તાળ પડી. પરિણામે એણે લાળા ચાવવાનો વારો આવ્યો. બાકી હતું તે, રોહિત શર્માની બલ્લેબાજીને કારણે ભારત ચૅમ્પિયન્સ ટ્રૉફીનો ફાઈનલ મુકાબલો જીત્યું એટલે શમાએ થૂંકેલું ગળવું પડ્યું હોય એમ રોહિત શર્માને અભિનંદન આપવા ઉપરાંત એની નેતૃત્વક્ષમતાનાં વખાણ પણ કરવાં પડ્યાં.