ദീപ കൊളുത്തിയ ദീപശിഖ

കളിക്കളം

- എൻ.എസ്. വിജയകുമാർ

റിയോ ഒളിംപിക്സിൽ വെറും 0.15 പോയിന്റ് വ്യത്യാസത്തിൽ ദീപ് തന്റെ കഴിവിന്റെ മുഴുവൻ പുറത്തെടുത്തിട്ടും വെങ്കല മെഡൽ നഷ്ടമായത് മറക്കാനാവില്ല. ഒളിംപിക്സിൽ അന്ന് ആദ്യമായാണ് ഒരു വനിത ജിംനാസ്റ്റ് ഇന്ത്യയിൽ നിന്നും മത്സരിക്കുവാൻ ഇറങ്ങിയത്.

നാൽപത്തി എട്ട് വർഷങ്ങൾക്ക് മുമ്പ് 1976 മോൺട്രീൽ ഒളിംപിക്സ് വിശ്വകായിക മേളയിൽ റൊമേനിയയിൽ നിന്നുള്ള ഒരു പതിന്നാലുകാരി ചരിത്രത്തിലാദ്യമായി ജിംനാസ്റ്റിക്സിൽ പെർഫെക്ട് ടെൻ എന്ന സ്കോറിലൂ ടെ സ്വർണ്ണമെഡൽ നേടിയ വാർത്ത വളരെ കൗതുകത്തോടെയാണ് വായിച്ചത്. അൺ ഈവൻ ബാറുകളിൽ അവരുടെ അസാമാന്യ പ്രകടനം ലോകമെമ്പാടും അന്നു വാഴ്ത്തപ്പെട്ടിരുന്നു. നാലു വർഷങ്ങൾക്കു ശേഷം മോസ്കോ ഒളിംപിക്സിലും അവർ പ്രകടനം ആവർത്തിച്ചു. അഞ്ചു സ്വർണ്ണമെഡലുകളാണ് നാദിയ എലേന കൊമ നേച്ചി ഒളിംപിക്സ് വ്യക്തി ഇനങ്ങളിൽ വാരിക്കൂട്ടിയത്. നാദിയയുടെ സുവർണ്ണ നേട്ടത്തിന്റെ ചിത്രമല്ലാതെ ജിംനാസ്റ്റിക്സ് എന്ന കായിക ഇനത്തെക്കുറിച്ച് കൂടുതലൊന്നും അറിയില്ലായിരുന്നു. 1982 ഏഷ്യൻ ഗെയിംസിലാണ് ദൽഹിയിൽ ജിംനാസ്റ്റിക്സ് മത്സരങ്ങൾ നേരിൽ കാണുവാൻ സാധിച്ചത് ടെലിവിഷനൊന്നും പ്രചാരമല്ലാത്ത അക്കാലത്ത് ദൽഹി ഏഷ്യൻ ഗെയിംസിൽ ആർട്ടിസ്റ്റിക് ഈവന്റ്സ് എന്ന ഒരിനം മാത്രമെ ഉൾപ്പെടുത്തിയിരുന്നതെങ്കിലും മത്സരങ്ങൾ കാണുവാനുള്ള അവസരം നഷ്ടപ്പെടുത്തിയില്ല. പിന്നീടാണ് ടെലിവിഷൻ സംപ്രേഷണങ്ങളുടെ വരവോടെ ജിംനാസ്റ്റിക്സ് ഇനങ്ങൾ കാണുവാനും മനസ്സിലാക്കുവാനും കഴിഞ്ഞത്.