முதல் முறையாக தொடரை கைப்பற்றி நியூசிலாந்து சாதனை

இந்திய அணியுடனான 2வது டெஸ்டில் 113 ரன் வித்தியாசத்தில் அபாரமாக வென்ற நியூசிலாந்து அணி, 2-0 என முன்னிலை பெற்றதுடன் இந்திய மண்ணில் முதல் முறையாக டெஸ்ட் தொடரை கைப்பற்றி சாதனை படைத்தது. மகாராஷ்டிரா கிரிக்கெட் சங்க ஸ்டேடியத்தில் நடைபெற்ற இப்போட்டியின் முதல் இன்னிங்சில் நியூசிலாந்து 259 ரன் குவிக்க, இந்தியா 156 ரன்னில் சுருண்டது. 103 ரன் முன்னிலையுடன் 2வது இன்னிங்சை விளையாடிய நியூசிலாந்து 2ம் நாள் முடிவில் 5 விக்கெட் இழப்புக்கு 198 ரன் எடுத்திருந்தது. பிளண்டெல் 30, பிலிப்ஸ் 9 ரன்னுடன் நேற்று 3வது நாள் ஆட்டத்தை தொடங்கினர்.

பிளண்டெல் 41 ரன்னில் வெளியேற, அடுத்து வந்த வீரர்கள் சொற்ப ரன்னில் ஆட்டமிழந்து அணிவகுத்தனர். நியூசிலாந்து 2வது இன்னிங்சில் 255 ரன் குவித்து ஆல் அவுட்டானது. கிளென் பிலிப்ஸ் 48 ரன்னுடன் (82 பந்து, 4 பவுண்டரி, 2 சிக்சர்) ஆட்டமிழக்காமல் இருந்தார். அந்த அணி 24 ரன்னுக்கு கடைசி 5 விக்கெட்டை இழந்தது குறிப்பிடத்தக்கது. இந்திய பந்துவீச்சில் வாஷிங்டன் சுந்தர் 4, ஜடேஜா 3, அஷ்வின் 1 விக்கெட் எடுத்தனர். இதைத் தொடர்ந்து, 359 ரன் எடுத்தால் வெற்றி என்ற கடினமான இலக்குடன் களமிறங்கியது இந்தியா. யாஷஸ்வி ஜெய்ஸ்வால், கேப்டன் ரோகித் இணைந்து துரத்தலை தொடங்கினர்.

ரோகித் 8 ரன் மட்டுமே எடுத்து சான்ட்னர் சுழலில் யங் வசம் பிடிபட இந்தியா அதிர்ச்சி தொடக்கத்தை சந்தித்தது. அடுத்து ஜெய்ஸ்வால் உடன் இணைந்த கில் பொறுப்புடன் கம்பெனி கொடுக்க, இருவரும் 2வது விக்கெட்டுக்கு 62 ரன் சேர்த்து நம்பிக்கை அளித்தனர். கில் 23 ரன் ஏடுத்து சான்ட்னர் பந்துவீச்சில் டேரில் வசம் பிடிபட்டார். டி20 போல அதிரடியாக விளையாடிய ஜெய்ஸ்வால் 41 பந்தில் அரை சதம் அடித்தார்.ஜெய்ஸ்வால் 77 ரன் (65 பந்து, 9 பவுண்டரி, 3 சிக்சர்), ரிஷப் பன்ட் ரன் அவுட்/டக் அவுட், விராத் கோஹ்லி 17 ரன் எடுத்து அடுத்தடுத்து விக்கெட்டை பறிகொடுக்க, இந்திய அணி பெரும் பின்னடைவை சந்தித்தது.