மகளிர் உதவித்தொகை திட்டத்தால் ஆட்சியை தக்க வைத்ததரி பாஜ கூட்டணி?

மக்களவை தேர்தலில் படுமதோல்வி அடைந்து 5 மாதங்களுக்கு பிறகு, மகாராஷ்டிர சட்டமன்றத் தேர்தலில் மகாயுதி கூட்டணி ஹாட்ரிக் வெற்றியை உறுதிப்படுத்தியுள்ளது. மகாயுதி கூட்டணிக்குள் பல மோதல்கள் வெடித்தபோதிலும், அக்கூட்டணி 230க்கும் மேற்பட்ட தொகுதிகளை கைப்பற்றி ஆட்சியை தக்க வைத்திருப்பது அனைவரையும் திரும்பிப் பார்க்க வைத்துள்ளது.

மகாயுதியின் இந்த அபார வெற்றிக்கு பின்னால் உள்ள முக்கிய காரணங்கள் என அரசியல் நிபுணர்கள் வெளியிட்ட பட்டியல்:
முதலாவது, லட்கி பகின் திட்டம். சட்டமன்றத் தேர்தலுக்கு முன்னதாக மகாயுதி அரசு பெண்களுக்கு மாதந்தோறும் ₹1,500 உதவித்தொகை வழங்கும் லட்கி பகின் திட்டத்தை அமல்படுத்தியது. மாநிலம் முழுவதும் 2.36 கோடிக்கும் அதிகமான பெண்கள் இத்திட்டத்தில் பயன்பெற்றனர். இந்த திட்டம் தேர்தலில் கேம் சேஞ்சராக அமைந்ததாக கூறப்படுகிறது. வெறும் வாக்குறுதியோடு நிறுத்திக் கொள்ளாமல், திட்டத்தை உடனடியாக அமலுக்கு கொண்டு வந்தது மகாயுதி அரசின் மீதான நம்பிக்கையை அதிகரிக்கச் செய்துள்ளது.

மத்திய பிரதேச மாநிலத்திலும் லட்லீ பக்னா என்ற உதவித்தொகை திட்டத்தை அமல்படுத்தி வெற்றி பெற்ற பாஜக, இங்கும் அதே திட்டத்தை செயல்படுத்தி வெற்றியை தன்வசப்படுத்தியுள்ளது.

அடுத்ததாக ஆர்எஸ்எஸ்சின் பிரசாரம். மகாராஷ்டிராவில் தேர்தலை முன்னிட்டு பாஜக-வின் வழிகாட்டியான ஆர்எஸ்எஸ் அமைப்பு மாநிலம் முழுவதும் பிரசாரத்தை மேற்கொண்டது. 'சஜாக் ரோஹோ' (எச்சரிக்கையாக இருங்கள்) என்ற பெயரில் அனைத்து கிராமங்களுக்கும் சென்று அவர்கள் மேற்கொண்ட பிரசாரம், மாநில வாக்கு சதவீதத்தை அதிகரிக்கச் செய்ததாக கூறப்படுகிறது.