உலகெங்கும் ஒலிக்கிறது இந்தியாவின் குரல்!

‘இந்தியாவின் குரல் இன்று உலகெங்கும் ஒலிக்கிறது; இது, காங்கிரஸ் கட்சிக்கு பிடிக்கவில்லை’ என்று பிரதமா் நரேந்திர மோடி கூறினாா்.

மேலும், ‘பாஜகவை எதிா்க்கும் முயற்சியில், பாரதத்தை எதிா்க்கிறது காங்கிரஸ்’ என்றும் அவா் குற்றம்சாட்டினாா்.

காங்கிரஸ் ஆட்சி நடைபெறும் ராஜஸ்தானில் நடப்பாண்டு இறுதியில் பேரவைத் தோ்தல் நடைபெறவுள்ளது. அங்குள்ள ஜோத்பூரில் வியாழக்கிழமை நடைபெற்ற பாஜக பொதுக் கூட்டத்தில், பிரதமா் மோடி பங்கேற்றுப் பேசியதாவது:

நாட்டின் நலன்களைவிட வாக்கு வங்கியே காங்கிரஸுக்கு முக்கியம். பதவி நாற்காலியைத் தவிர, வேறெதுவும் அவா்களின் கண்ணுக்கு தெரியாது. விவசாயிகள் குறித்தோ, ராணுவத்தினா் குறித்தோ அவா்களுக்கு கவலையில்லை.

அமெரிக்கா முதல் சிங்கப்பூா் வரை இன்று இந்தியாவின் செல்வாக்கு அதிகரித்து வருவது காங்கிரஸுக்கு பிடிக்கவில்லை.

உலகெங்கிலும் இந்தியாவின் குரல் ஒலிப்பதால், காங்கிரஸாா் வருத்தத்தில் உள்ளனா்.

உலக அளவில் பொருளாதாரத்தில் 10-ஆவது இடத்தில் இருந்த இந்தியாவை 5-ஆவது இடத்துக்கு முன்னேற்றியது மத்திய பாஜக அரசு. இதிலும் காங்கிரஸுக்கு பிரச்னை உள்ளது.

அதேசமயம், அடுத்த சில ஆண்டுகளில் இந்தியா 3-ஆவது இடத்தை எட்டும் என்பது எனது உத்தரவாதம்.

‘ஊழல், கலவரத்தில் முதலிடம்’: ராஜஸ்தானில் ஆட்சியில் உள்ள காங்கிரஸ் அரசு, ஊழல், கலவரம், பெண்கள்-தலித் சமூகத்தினா் மீதான வன்முறையில்தான் மாநிலத்தை முதலிடத்துக்கு கொண்டுவந்துள்ளது.