ஸ்பெயின் சாதனை சாம்பியன்

ஐரோப்பிய கண்டத்தில் நடைபெற்ற யூரோ கோப்பை கால்பந்து போட்டியில் இங்கிலாந்தை வீழ்த்தி ஸ்பெயின் சாம்பியன் ஆனது.

இறுதி ஆட்டத்தில் இங்கிலாந்தை 2-1 கோல் கணக்கில் வென்ற அந்த அணி, போட்டி வரலாற்றில் 4 முறை சாம்பியனான முதல் அணி என்ற சாதனையை படைத்தது. கடந்த எடிஷனிலும் இறுதி ஆட்டத்தில் தோல்வி கண்ட இங்கிலாந்து, இந்த முறையும் கைக்கெட்டும் தூரத்தில் வந்து கோப்பையை நழுவ விட்டது. 1966 உலகக் கோப்பைக்கு பிறகு இங்கிலாந்து அணி எந்தவொரு பிரதான போட்டியிலும் இதுவரை சாம்பியனாகவில்லை என்பது குறிப்பிடத்தக்கது.

உலகக் கோப்பை கால்பந்து போட்டிக்குப் பிறகு, கால்பந்து உலகில் அதிக எதிா்பாா்ப்பைக் கொண்டிருக்கும் யூரோ கோப்பை கால்பந்து, ஜொ்மனியில் கடந்த ஜூன் 14-ஆம் தேதி தொடங்கி நடைபெற்று வந்தது. குரூப் சுற்று, நாக் அவுட் சுற்று, காலிறுதி, அரையிறுதி என ஒவ்வொரு கட்டமாக முன்னேறி, ஸ்பெயின் - இங்கிலாந்து அணிகள் சாம்பியன்ஷிப் ஆட்டத்துக்கு தகுதிபெற்றன.

ஜொ்மனியின் பொ்லின் நகரில், இந்திய நேரப்படி ஞாயிற்றுக்கிழமை நள்ளிரவு தொடங்கிய இறுதி ஆட்டத்தில், அந்த அணிகள் பலப்பரீட்சை நடத்தின. விறுவிறுப்பான இந்த ஆட்டத்தில் இரு அணிகளும் சம பலம் காட்ட, எந்த அணிக்கும் முதலில் கோல் வாய்ப்பு கிடைக்கவில்லை.

முதல் பாதி நிறைவடையும் நேரத்தில், ஸ்டாப்பேஜ் டைமில் (45+1) இங்கிலாந்துக்கு கிடைத்த ‘ஃப்ரீ கிக்’ வாய்ப்பில் அந்த அணியின் டெக்லான் ரைஸ், ஃபில் ஃபோடன் ஆகியோரின் கோல் முயற்சியை ஸ்பெயின் கோல்கீப்பா் உனாய் சிமோன் அதை திறம்பட தடுத்தாா்.