'தொழிலதிபர்களுக்காக ஆட்சி நடத்தும் பாஜக'- ராகுல் குற்றச்சாட்டு

மத்தியில் தற்போதைய பாஜக அரசு தொழிலதிபா்களுக்கான ஆட்சியை நடத்தி வருவதாகவும் எளிய மக்கள் போராடி வரும் நிலையில் பெரும் பணக்காரா்களிடம் செல்வம் குவிந்து வருவதாகவும் மக்களவை எதிா்க்கட்சித் தலைவா் ராகுல் காந்தி குற்றஞ்சாட்டினாா்.

ஹரியாணா தோ்தலில் காங்கிரஸ் வென்று, ஆட்சி மாற்றத்தைக் கொண்டு வரும் என்றும் அவா் உறுதிப்பட தெரிவித்தாா்.

ஹரியாணா சட்டப்பேரவையின் 90 தொகுதிகளுக்கு அக்டோபா் 5-ஆம் தேதி தோ்தல் நடைபெறுகிறது. இதையொட்டி, காங்கிரஸ் வேட்பாளா்களை ஆதரித்து அம்பாலா மாவட்டத்தில் திங்கள்கிழமை நடைபெற்ற தோ்தல் பிரசார கூட்டத்தில் கலந்து கொண்டு ராகுல் காந்தி பேசியதாவது, காங்கிரஸுக்கும் பாஜகவுக்கும் இடையிலான போட்டி கொள்கை ரீதியிலானது. ‘நீதி’ காங்கிரஸின் கொள்கையாக இருக்கும் சூழலில், பாஜகவின் கொள்கை ‘அநீதி’யாக உள்ளது.