பருவநிலை மாற்றத்தால் இந்தியா 25% ஜிடிபி இழக்கும் அபாயம்!

பருவநிலை மாற்றத்தால் வரும் 2070-ஆம் ஆண்டுக்குள் இந்தியா 24.7 சதவீத மொத்த உள்நாட்டு உற்பத்தியை (ஜிடிபி) இழக்கும் எனவும் ஆசியா மற்றும் பசிபிக் பிராந்தியம் 16.9 சதவீத இழப்பைச் சந்திக்கும் எனவும் ஆசிய வளர்ச்சி வங்கி (ஏடிபி) கணித்துள்ளது.

உயரும் கடல் மட்டம் மற்றும் தொழிலாளர் உற்பத்தித் திறன் குறைவு ஆகியவற்றால் ஏற்படும் இழப்புகளால் குறைந்த வருமானம் கொண்ட பலவீனமான பொருளாதாரங்கள் கடுமையாக பாதிக்கப்படும் என்று அந்த வங்கி வெளியிட்ட 'ஆசியா-பசிபிக் பருவநிலை' அறிக்கையில் விவரிக்கப்பட்டுள்ளது.

அறிக்கையின்படி, பருவநிலை நெருக்கடி தொடர்ந்து வேகமெடுத்தால், பிராந்தியத்தில் சுமார் 30 கோடி மக்கள் வரை கடலோர வெள்ளத்தில் பாதிக்கும் அபாயம் உள்ளது. 10,000 கோடி டாலர் மதிப்புள்ள கடலோர சொத்துகள் 2070-ஆம் ஆண்டுக்குள் வருடாந்திர சேதத்தைச் சந்திக்க நேரிடும்.

உலகளாவிய உமிழ்வில் பிராந்தியத்தின் பங்கு 2000-ஆம் ஆண்டின் 29.4 சதவீதத்திலிருந்து 2021-இல் 45.9 சதவீதமாக உயர்ந்தது. இதில் சீனாவின் பங்கு மட்டும் 30 சதவீதமாகும்.