வக்ஃப் விவகாரம் - நாடாளுமன்ற கூட்டுக் குழுவிலிருந்து எதிர்க்கட்சி எம்.பி.க்கள் விலகல்?

வக்ஃப் சட்டத் திருத்த மசோதாவை ஆராயும் நாடாளுமன்ற கூட்டுக் குழு கூட்டங்களில் தங்களுக்கு முட்டுக் கட்டையிடப்படுவதால், அந்தக் குழுவில் இருந்து தாங்கள் விலகும் நிலை ஏற்படும் என்று மக்களவைத் தலைவர் ஓம் பிர்லாவிடம் சமர்ப்பிக்க உள்ள கடிதத்தில், எதிர்க்கட்சி எம்.பி.க்கள் தெரிவித்துள்ளதாக தகவல் வெளியாகியுள்ளது.

அந்தக் குழுவின் தலைவர் ஜகதாம்பிகா பால் மீதான அதிருப்தி காரணமாக இந்த முடிவுக்கு எதிர்க்கட்சி எம்.பி.க்கள் வந்துள்ளதாகக் கூறப்படுகிறது.

நாடு முழுவதும் முஸ்லிம்களின் தொண்டு பணிகளுக்கு அர்ப்பணிக்கப்படும் வக்ஃப் சொத்துக்களை, மாநிலங்களில் வக்ஃப் வாரியங்கள் நிர்வகிக்கின்றன. இந்நிலையில், மத்திய அரசு கொண்டு வந்துள்ள வக்ஃப் சட்டத் திருத்த மசோதாவை நாடாளுமன்ற கூட்டுக் குழு ஆராய்ந்து வருகிறது.

இந்தக் கூட்டுக் குழுவில் இடம் பெற்றுள்ள ஆளும் பாஜக எம்.பி.க்கள் மசோதாவுக்கு ஆதரவாகவும், எதிர்க்கட்சி எம்.பி.க்கள் மசோதாவுக்கு எதிராகவும் உள்ளனர்.