திருபுவனம் ராமலிங்கம் கொலை வழக்கு: தேடப்பட்ட முக்கிய நபர் கைது

சென்னை, நவ. 15: தஞ்சாவூர் அருகே திருபுவனத்தைச் சேர்ந்த ராமலிங்கம் கொலை வழக்கு தொடர்பாக தேடப்பட்டு வந்த முக்கிய நபரான முகமது அலி ஜின்னா வெள்ளிக்கிழமை கைது செய்யப்பட்டார்.

தஞ்சாவூர் மாவட்டம், திருபுவனம் மேலதூண்டில் விநாயகம்பேட்டையைச் சேர்ந்தவர் பாமக முன்னாள் நகரச் செயலர் வ.ராமலிங்கம். இவர், அந்தப் பகுதியில் சிலர் மதமாற்றத்தில் ஈடுபட்டதைக் கண்டித்தார்.

இந்நிலையில் ராமலிங்கம், 2019-ஆம் ஆண்டு பிப். 5-ஆம் தேதி தனது கடையிலிருந்து வீட்டுக்குச் செல்லும்போது வெட்டிக் கொலை செய்யப்பட்டார்.

இது குறித்து திருவிடைமருதூர் போலீஸார் வழக்குப் பதிந்து, குறிச்சிமலை பகுதியைச் சேர்ந்த எச். முகமது ரியாஸ், திருபுவனத்தைச் சேர்ந்த எஸ். நிஸாம் அலி, ஒய். சர்புதீன், என். முகமது ரிஸ்வான் உள்பட பலரை கைது செய்தனர்.

இந்த வழக்கின் விசாரணை தேசிய புலனாய்வு முகமைக்கு (என்ஐஏ) மாற்றப்பட்டது. இதையடுத்து, என்ஐஏ அதிகாரிகள் புதிதாக ஒரு வழக்கைப் பதிவு செய்தனர்.