தமிழக அரசு கோரிய பேரிடர் நிவாரண நிதியை ஒதுக்கவில்லை

மத்திய அரசைக் கண்டித்து திமுக செயற்குழு தீர்மானம்

புயல் பாதிப்பால் தமிழகத்துக்கு ஏற்பட்ட பாதிப்புகளைச் சீரமைக்க மாநில அரசு கோரிய நிதியை ஒதுக்காத மத்திய அரசுக்கு கண்டனம் தெரிவிப்பதாக திமுக செயற்குழு தெரிவித்துள்ளது.

மேலும், அம்பேத்கரை அவதூறு செய்து அவரது தியாகத்தை இழிவுபடுத்திய உள்துறை அமைச்சர் அமித் ஷாவுக்கும் கண்டனம் தெரிவிப்பதாக தீர்மானம் நிறைவேற்றப்பட்டுள்ளது.

திமுக செயற்குழுக் கூட்டம் முதல்வரும் கட்சித் தலைவருமான மு.க. ஸ்டாலின் தலைமையில் சென்னை அண்ணா அறிவாலயத்தில் ஞாயிற்றுக்கிழமை நடைபெற்றது.

இந்தக் கூட்டத்தில் நிறைவேற்றப்பட்ட தீர்மானங்கள்:

ஜனநாயகத்தின் திருக்கோயில் நாடாளுமன்றத்திலேயே லான் அம்பேத்கரை தரம் தாழ்த்தி, அவதூறாகப் பேசி அவரது தியாகத்தை இழிவுபடுத்தியிருக்கும் உள்துறை அமைச்சரின் பேச்சு கண்டனத்துக்குரியது. அவரின் பேச்சை திசைதிருப்ப நாடாளுமன்றத்துக்கு உள்ளேயும் வெளியேயும் பாஜக நடத்தும் நாடகங்கள் அதைவிட கேலிக்கூத்தானது.

ஃபென்ஜால் புயல் பாதிப்பு: ஃபென்ஜால் புயலுக்கு அரசு கோரிய அவசரத் தொகையான ரூ.2,000 கோடியையோ அல்லது நிரந்தர மறுசீரமைப்புக்கான ரூ.6,675 கோடியை இதுவரை மத்திய அரசு ஒதுக்காமல், தமிழ்நாட்டு மக்களை வஞ்சிப்பதற்கு செயற்குழு தனது கண்டனத்தை தெரிவித்துக் கொள்கிறது.

மத்திய அரசு பேரிடர் நிதி என்பது பாஜகவின் கட்சி நிதி அல்ல என்பதை மனதில் நிலைநிறுத்தி இயற்கை சீற்றத்தால் பாதிக்கப்பட்ட மாநில அரசு கேட்கும் பேரிடர் நிதியை விரைவில் மத்திய அரசு தமிழ்நாட்டுக்கு ஒதுக்க வேண்டும் என செயற்குழு கேட்டுக்கொள்கிறது.

ஒரே நாடு ஒரே தேர்தல் மசோதாவை அவசர அவசரமாக கொண்டு வருவதன் மூலம் அழிக்க முடியாத இழுக்கை ஏற்படுத்தி வரும் மத்திய அரசுக்கு திமுக செயற்குழு கண்டனம் தெரிவிக்கிறது. நாடாளுமன்ற கூட்டுக்குழுவுக்கு மசோதாவை அனுப்பியிருந்தாலும், அதை முழுமையாகக் கைவிட வேண்டும்.