5 ஆண்டுகளில் ஒரு டிரில்லியன் டாலர் பொருளாதாரம் சாத்தியமா?

நிதித் துறை முதன்மைச் செயலர் த.உதயச்சந்திரன் விளக்கம்

சென்னை, மார்ச் 14: அடுத்த 5 ஆண்டுகளுக்குள் தமிழ்நாட்டின் பொருளாதாரத்தை ஒரு டிரில்லியன் டாலர் மதிப்புடையதாக மாற்றுவது சாத்தியமா என்ற கேள்விக்கு நிதித் துறை முதன்மைச் செயலர் த.உதயச்சந்திரன் பதிலளித்தார்.

மாநிலத்தின் வளர்ச்சி விகிதம் 8-இல் இருந்து 12 சதவீதமாக அதிகரிக்கும் போது தான் அத்தகைய பொருளாதாரம் சாத்தியம் என்று மாநில திட்டக்குழு துணைத் தலைவர் ஜெ.ஜெயரஞ்சன் தெரிவித்திருந்தார். இந்த நிலையில், நிதிநிலை அறிக்கையில் உள்ள முக்கிய அம்சங்களை விளக்கி தலைமைச் செயலகத்தில் செய்தியாளர்களுக்கு நிதித் துறை முதன்மைச் செயலர் த.உதயச்சந்திரன் வெள்ளிக்கிழமை அளித்த பேட்டி:

அனைத்துத் தரப்பினரையும் கலந்து ஆலோசித்து நிதிநிலை அறிக்கையைத் தயாராக செய்துள்ளோம். குறிப்பாக, முதல்வர் தலைமையிலான பொருளாதார ஆலோசனைக் குழுவில் இடம்பெற்றுள்ள புகழ் பெற்ற அறிஞர்களில் தொடங்கி ஊராட்சி ஒன்றியப் பெருந்தலைவர்கள் வரை ஆலோசித்தோம். அமைச்சர்கள், அதிகாரிகள் தொடங்கி தன்னார்வ தொண்டு நிறுவனங்கள் வரை பல்வேறு தரப்பினரிடமும் கருத்துகளைக் கேட்டோம். பரந்துபட்ட ஆலோசனையை நடத்தி நிதிநிலை அறிக்கையைத் தாக்கல் செய்துள்ளோம்.

கடன்கள் அச்சமில்லை: தேசிய சராசரியைவிட தமிழ்நாட்டின் பொருளாதாரம் அதிகமாக வளர்ந்து வருகிறது. மாநிலத்தின் நிதிப் பற்றாக்குறையும் தொடர்ச்சியாக குறைந்து வருகிறது. பற்றாக்குறை அளவானது நிதிப் பொறுப்புடைமைச் சட்டத்தின் கீழ், 3 சதவீதத்துக்குள் இருக்க வேண்டும். 2020-21-ஆம் நிதியாண்டில் 4.91 சதவீதமாக இருந்த அளவை 2025-26-ஆம் நிதியாண்டில் 3 சதவீதமாகக் குறைப்போம் என்ற நம்பிக்கை உள்ளது.