புதுச்சேரிக்கு ரயில் போக்குவரத்து வசதியை விரிவுபடுத்த மத்திய அமைச்சருக்கு கவர்னர் கடிதம்

புதுச்சேரி - விழுப்புரம் இடையிலான ரயில் போக்குவரத்து வசதியை விரிவு படுத்துவது தொடர்பாக மத்திய ரயில்வே அமைச்சர் அஸ்வினி வைஷ்ணவிக்கு, கவர்னர் தமிழிசை செளந்தர் ராஜன் கடிதம் எழுதியுள்ளார்.

அதில், ஆந்திர மாநிலம் காக்கிநாடா, செங்கல்பட்டு இடையிலான ரயில் சேவை புதுச்சேரி வரை நீட்டிக்கப்பட்டிருப்பதற்கு நன்றி. புதுச்சேரிவிழுப்புரம் இடையிலான ரயில் பாதை கட்டமைப்பை மேம்படுத்தவும் மற்றும் புதுச்சேரியில் ரயில் முனையத் திட்டத்தைச் செயல்படுத்த வேண்டும். புதுச்சேரி மாநிலத்தின் தலைநகரை அதன் இணைப்பு பகுதியான ஏனாம் மண்டலத்தோடு இணைக்க வேண்டும் என்ற எங்களது நீண்ட நாள் கோரிக்கையை பரிசீலித்து காக்கிநாடாசெங்கல்பட்டு இடையிலான ரயில் சேவையை புதுச்சேரி வரை நீட்டித்ததற்கு எனது நன்றி. இந்தத் திட்டத்தை நிறைவேற்றுவதற்கு தாங்கள் எடுத்துக் கொண்ட முயற்சியைப் பாராட்டுகிறேன்.

ஆயினும், ரயில்வே வாரியம் உத்தரவு பிறப்பித்து இருந்தாலும் அதை செயல்படுத்துவதில் தாமதம் ஏற்பட்டுள்ளதையும் உங்களது கவனத்திற்கு கொண்டு வருகிறேன். 03-04-2023 முதல் ரயில் சேவை தொடங்கும் என்று ரயில்வே வாரிய உத்தரவில் குறிப்பிடப்பட்டு இருக்கிறது. ஆனால் இதுவரை நடைமுறைப்படுத்தப்படாததால் இப்பகுதி மக்கள் கடும் அதிருப்தி அடைந்துள்ளனர்.