தர்மபுரி மாவட்டத்தில் நிலுவையில் உள்ள நீர்ப்பாசன திட்டங்களை நிறைவேற்ற வேண்டும்

அன்புமணி ராமதாஸ் பேச்சு

தர்மபுரி மாவட்டம் பொம்மிடி, கம்பைநல்லூர் பகுதிகளில் நடந்த பா.ம.க. நிர்வாகிகள் இல்ல திருமண விழாவை கட்சியின் தலைவர் டாக்டர் அன்புமணி ராமதாஸ் தலைமை தாங்கி நடத்தி வைத்தார்.

அப்போது அவர் பேசியதாவது: தர்மபுரி மாவட்டத்தைச் சேர்ந்த 3 லட்சத்திற்கும் மேற்பட்ட இளைஞர்கள் தொழிலாளர்கள் வேலைவாய்ப்புக்காக வெளிமாநிலங்கள் வெளி மாவட்டங்களுக்கு இடம் பெயர்ந்துள்ளனர். விவசாயிகள் தண்ணீர் இல்லாத காரணத்தால் கூலி வேலைக்கு செல்கிறார்கள்.

ஒகேனக்கல் உபரி நீர் திட்டத்தை செயல்படுத்தினால் தர்மபுரி மாவட்டத்தில் 80 சதவீத பிரச்சினைகள் தீர்ந்துவிடும். ஆனால் இந்த திட்டத்தை நிறைவேற்ற தமிழ்நாடு அரசு இதுவரை நடவடிக்கை எடுக்கவில்லை. தர்மபுரி மாவட்டத்தில் நிலுவையில் உள்ள நீர்ப்பாசன திட்டங்களை நிறைவேற்ற வேண்டும்.