பரபரப்பான சூழ்நிலையில் பாஜக எம்.எல்.ஏ.,க்கள் மேலிட பார்வையாளர்களுடன் ஆலோசனை அமைச்சரவையில் மாற்றம் வருமா?

பாஜக எம். எல். ஏ.க்களுடன் மேலிட பார்வையாளர்கள் திடீர் ஆலோசனையில் ஈடுபட்டதால் அமைச்சரவையில் மாற்றம் வருமா என பெரும் எதிர்பார்ப்பு நிலவியுள்ளது.

புதுச்சேரி பாராளுமன்ற தேர்தல் தோல்விக்கு பிறகு 3 பாஜக எம். எல். ஏ.க்கள் மற்றும் 3 பாஜக ஆதரவு சுயேட்சை எம். எல். ஏ.க்கள் அரசின் மீது அதிருப்தியில் உள்ளனர். தேர்தல் தோல்விக்கு முதலமைச்சர் ரங்கசாமியும், பாஜக அமைச்சர்களின் அணுகுமுறையும் காரணம் என தொடர்ந்து குற்றம் சாட்டி வருகின்றனர்.

இதே நிலை தொடரும் பட்சத்தில் எதிர்வரும் சட்டமன்ற தேர்தலில் பாஜக பெரும் தோல்வியை சந்திக்க கூடும் என போர் கொடி உயர்த்தி உள்ளனர். என். ஆர். காங்கிரஸ் கூட்டணியில் இருந்து வெளியேற வேண்டும். இல்லையெனில் பாஜக அமைச்சர்களை சுழற்சி முறையில் மாற்ற வேண்டும் என கட்சி மேலிடத்தை சந்தித்து தொடர்ந்து முறையிட்டு வந்தனர்.

இது போன்ற பரபரப்பான சூழ்நிலையில் அதிருப்தியில் உள்ள பாஜக எம். எல். ஏ.க்கள் லாட்டரி அதிபரின் மகன் ஜோஸ் சார்லஸ் மார்ட்டின் பின்னணியில் அணிவகுத்து பல்வேறு தொகுதிகளில் மழை நிவாரணம் வழங்கினர். ஏ. எப். டி. மில் அருகே அரசை கண்டித்து நடந்த கூட்டத்திலும் பங்கேற்றனர்.