મ્યુનિ.નો વાહનવેરો નહીં ભરનાર પાસેથી 18 ટકા વ્યાજ અને પેનલ્ટી વસૂલ કરાશે

રેવન્યુ કમિટીએ મંજૂર કરેલી દરખાસ્તને બોર્ડની મંજૂરી બાદ સરકારને મોકલાશે : જૈનિક વકીલ નોટિસ મળ્યા પછી પણ વાહનવેરો ભરવામાં નહીં આવે તો વાહન જપ્ત કરાશે : રેવન્યુ કમિટી ચેરમેન

મ્યુનિ.ની આવકનાં મહત્ત્વના સ્ત્રોત એવા વ્હીકલ ટેક્સના નિયમોનાં છીંડા બંધ કરતાં રેવન્યુ કમિટીએ વાહનવેરો નહીં ભરનાર પાસેથી ૧૮ ટકા વ્યાજ અને પેનલ્ટી સાથે વાહનવેરો વસૂલ કરવાની દરખાસ્ત મંજૂર કરી દીધી છે.

મ્યુનિ. રેવન્યુ કમિટી ચેરમેન જૈનિક વકીલે જણાવ્યું હતું કે, જેમણે વાહનવેરો ભર્યો નથી તેવા વાહનમાલિકો ૩૧-૩-૨૪ પહેલાં બાકી વેરો ભરી દેશે તો તેમની સામે વ્યાજ-પેનલ્ટીની જોગવાઇ લાગુ કરાશે નહીં. કાયદામાં જોગવાઇ થઇ ગયાં બાદ આવા વાહનમાલિકો પાસેથી વ્યાજ-દંડ પણ વસૂલ કરવામાં આવશે અને તેમ છતાં જો વાહનચાલકો વાહનવેરો-વ્યાજ અને દંડની રકમ ભરશે નહીં તો તેમનું વાહન જપ્ત કરી લેવા સુધીની સત્તા મ્યુનિ. વાહનવેરા વિભાગ પાસે છે.