நைஜீரியா, பிரேசில், கயானா: பிரதமர் நரேந்திர மோடி 3 நாடுகளுக்கு செல்கிறார்!

பிரதமர் நரேந்திர மோடி நவம்பர் 16 முதல் 21-ஆம் தேதிவரை நைஜீரியா, பிரேசில், கயானா ஆகிய நாடுகளுக்கு சுற்றுப்பயணம் மேற்கொள்கிறார். பிரேசில் நாட்டில் ஜி-20 தலைவர்கள் கூட்டத்தில் கலந்து கொள்கிறார்.

பிரதமர் நரேந்திர மோடி 3-ஆவது முறையாக பதவி ஏற்ற பின்னர் பல நாடுகளுக்கு சென்றுள்ளார். அந்த வகையில் ரஷ்யாவுக்கு 2 முறை பயணமாகி உள்ளார்.

உக்ரைன், ஆஸ்திரியா, போலந்து ஆகிய நாடுகளுக்கும் சென்றுள்ளார். ஐ.நா. சபை கூட்டத்தில் பங்கேற்பதற்காக அமெரிக்காவுக்கும் பயணமானார். மேலும் லாவோஸ் நாட்டிற்கும் சென்றார்.

இந்த நிலையில் அவர் நவம்பர் 16 முதல் 21-ஆம் தேதி வரை நைஜீரியா, பிரேசில், கயானா ஆகிய 3 நாடுகளுக்கு செல்கிறார். அவருடைய பயணத்தின் முக்கிய நோக்கம் பிரேசில் நாட்டில் நடக்க உள்ள ஜி-20 மாநாட்டில் பங்கேற்பதுதான்.