சென்னை பட்டினப்பாக்கத்தில் குடிசை மாற்று வாரிய குடியிருப்பின் பால்கனி இடிந்து விழுந்து வாலிபர் பலி

* உறவினர்கள் சாலை மறியல், பல கி.மீ. தூரத்திற்கு ஸ்தம்பித்த போக்குவரத்து; *ரூ. 5 லட்சம் நிவாரண நிதி அறிவிப்பு!

சென்னை பட்டினப்பாக்கத்தில் குடிசை மாற்று வாரிய குடியிருப்பின் பால்கனி இடிந்து விழுந்து வாலிபர் சையத் குலாப் உயிரிழந்த சம்பவத்தை கண்டித்து அவரது உறவினர்கள் சாலை மறியலில் ஈடுபட்டதால் பல கி.மீட்டர் தூரத்திற்கு போக்குவரத்து ஸ்தம்பித்தது. உயிரிழந்த வாலிபரின் குடும்பத்திற்கு ரூ.5 லட்சம் நிவாரண நிதி வழங்கப்படுவதாக அமைச்சர் தா. மோ.அன்பரசன் அறிவித்துள்ளார்.

சென்னை பட்டினப்பாக்கம் சீனிவாசபுரம் குடிசை மாற்றுவாரிய குடியிருப்பை சேர்ந்தவர் சையத் சிலான்.

இவரது மகன் சையத்குலாப் (வயது 23). இவர் தனியார் நிறுவனத்தில் எலக்ட்ரீஷியன் ஆக பணிபுரிந்தார்.

வேலை முடிந்து நேற்று இரவு சுமார் 9.30 மணி அளவில் தனது வீட்டு அருகே அமைந்துள்ள மசூதியில் தொழுகை முடித்துவிட்டு வீட்டிற்கு திரும்பிக் கொண்டிருந்தார்.

அப்போது அப்பகுதியில் குடிசை மாற்றுவாரிய குடியிருப்பின் மூன்றாவது தளத்தில் இருந்த பால்கனி மேற்பக்க கூரை இடிந்து, சையத் குலாபின் தலை மீது விழுந்தது.

இதில், படுகாயமடைந்த அவரை அப்பகுதியினர் மீட்டு சிகிச்சைக்காக ராயப் பேட்டை அரசு மருத்துவமனைக்கு அனுப்பி வைத்தனர். தீவிர சிகிச்சை பிரிவில் அனுமதிக்கப்பட்ட குலாப் சற்றுநேரத்திலேயே சிகிச்சை பலனின்றி பரிதாபமாக உயிரிழந்தார். தொடர்ந்து, அங்கு இருந்த குலாப்பின் உறவினர்களும் நண்பர்கள் மருத்துவமனை வளாகத்தில் சூழ்ந்தபடி கதறி அழுத காட்சி காண்போரை கண்கலங்க வைத்தது.