ഇന്ത്യക്കാരനായ സഹോദരൻ 75 വർഷത്തിനു ശേഷം പാകിസ്താനിൽ സഹോദരിയെ കണ്ടുമുട്ടി

കുടുംബങ്ങളെ ഒരുമിപ്പിച്ച് കർതാർപൂർ ഇടനാഴി 

ഇസ്ലാമാബാദ്: എഴുപത്തഞ്ചു വർഷം മുമ്പു വേർപെട്ടുപോയ കുടുംബബന്ധം വിളക്കിച്ചേർക്കാൻ ഇളയ സഹോദരിയുടെ ക്ഷണമുണ്ടായപ്പോൾ അമർജിത് സിങ് അനുഭവിച്ച ആഹ്ളാദത്തിന് അതിരില്ലായിരുന്നു. അവരെ കാണാൻ അട്ടാരി-വാഗാ അതിർത്തി വഴി പാകിസ്താനിലെത്തുമ്പോൾ ആരോഗ്യപ്രശ്നങ്ങൾ പോലും അദ്ദേഹം മറന്നു. കർതാർപൂർ ഗുരുദ്വാര ദർബാർ സാഹിബിൽ ഇരുവരും കണ്ടുമുട്ടിയപ്പോഴാകട്ടെ, സഹോദരി കുൽസൂം അക്തറിന് വികാരങ്ങൾ നിയന്ത്രിക്കാനുമായില്ല. ഒരു നിമിഷത്തെ അമ്പരപ്പിനും നിശബ്ദതയ്ക്കും ശേഷം ഇരുവരും കെട്ടിപ്പിടിച്ചു കരഞ്ഞു. അതോടെ ആ ധന്യമുഹൂർത്തത്തിനു സാക്ഷ്യം വഹിച്ച എല്ലാ കണ്ണുകളും ഈറനണിഞ്ഞു.