മിണ്ടരുത് ചൈനയിൽ പ്രതിഷേധക്കാരെ നിശബ്ദരാക്കി പോലീസ്

നഗരങ്ങളിൽ കനത്ത പരിശോധന സമൂഹമാധ്യമങ്ങളിലും കർശന നിരീക്ഷണം കോവിഡ് വാക്സിനേഷൻ ഊർജിതമാക്കി

ബെയ്ജിങ്: പ്രസിഡന്റ് ഷീ ചിൻപിങ്ങിനും കടുത്ത കോവിഡ് ലോക്ക്ഡൗൺ നടപടികൾക്കുമെതിരേ പടർന്ന പ്രതിഷേധത്തീയണച്ച് ചൈനീസ് സർക്കാർ. സമരക്കാർക്കെതിരേ കടുത്ത നടപടിയെടുത്തും സമൂഹമാധ്യമങ്ങളിലുൾപ്പെടെ നിരീക്ഷണം കർശനമാക്കിയുമാണ് പ്രതിഷേധക്കാരെ നിശബ്ദരാക്കിയത്.

ബെയ്ജിങ്, ഷാങ്ഹായ് ഉൾപ്പെടെയുള്ള നഗരങ്ങളിൽ മഫ്തിയിലുൾപ്പെടെ നൂറുകണക്കിനു പോലീസുകാരെ വിന്യസിച്ചായിരുന്നു പരിശോധന. ആളുകളുടെ ഫോണുകൾ പിടിച്ചെടുത്തും പരിശോധന നടത്തി. നിരവധിപേർ അറസ്റ്റിലായതായും സൂചനയുണ്ട്. അതേസമയം, നിരവധി വിദേശരാജ്യങ്ങളിൽ ചൈനീസ് എംബസികൾക്കു പുറത്ത് പ്രതിഷേധം നടന്നു.