ഇനി ലങ്കയോട്

മത്സരം വൈകിട്ട് ഏഴ് മുതൽ സ്റ്റാർ സ്പോർട്സിലും ഹോട്ട്സ്റ്റാറിലും 

മുംബൈ: ഇന്ത്യയും ശ്രീലങ്കയും തമ്മിലുള്ള ട്വന്റി20 ക്രിക്കറ്റ് പരമ്പരയ്ക്ക് ഇന്നു തുടക്കം. വാങ്കഡെ സ്റ്റേഡിയത്തിൽ വൈകിട്ട് ഏഴ് മുതൽ നടക്കുന്ന ഒന്നാം ട്വന്റി20യോടെ ശ്രീല ങ്കൻ ടീമിന്റെ ഇന്ത്യൻ പര്യടനം തുടങ്ങും.

റണ്ണൊഴുകുന്ന വേദിയാണു വാങ്കഡെ. വലുപ്പം കുറഞ്ഞ ബൗണ്ടറികൾ ബാറ്റർമാരെ ആവേശം കൊള്ളിക്കും. പിന്തുടരുന്ന ടീമുകളുടെ ഭാഗ്യ ഗ്രൗണ്ടുമാണ്. ഇവിടെ നടന്ന 41 ട്വന്റി20 കളിൽ 24 ലും പിന്തുടർന്നു ജയിക്കുകയായിരുന്നു. ഇന്നത്തെ തെളിഞ്ഞ കാലാവസ്ഥയും മത്സരത്തിന് അനുകൂലമാണ്. 2021 മുതൽ ലങ്കയ്ക്കെതിരേ നടന്ന ട്വന്റി20 കളിൽ ഇന്ത്യക്കു നേരിയ മുൻതൂക്കം നേടാനായി. ഏഴ് കളികളിൽ നാലിലും അവരാണു ജയിച്ചത്.

ട്വന്റി20 യിൽ ഏറ്റവും കൂടുതൽ വിക്കറ്റെടുക്കുന്ന ഇന്ത്യൻ ബൗളർ എന്ന റെക്കോഡി ലേക്ക് അടുക്കുകയാണു ലെഗ് സ്പിന്നർ യുവേന്ദ്ര ചാഹാൽ. ചാഹാലിന് ഭുവനേശ്വർ കുമാറിന്റെ 90 വിക്കറ്റുകളെന്ന റെക്കോഡ് മറികടക്കാൻ ഈ പരമ്പരയിൽ നാല് പേരെ പുറത്താക്കിയാൽ മതി.