ഇന്ത്യക്ക് ഏകദിന പരമ്പര നിസാരം

 മുഹമ്മദ് ഷമി മാൻ ഓഫ് ദ് മാച്ച്

ന്യൂസിലൻഡിനെതിരായ ഏകദിന ക്രിക്കറ്റ് പരമ്പരയിലെ രണ്ടാമത്തെ മത്സരത്തിൽ ഇന്ത്യക്ക് എട്ട് വിക്കറ്റിന്റെ തകർപ്പൻ ജയം.

റായ്പുരിലെ ഷഹീദ് വീർ നാരായൺ സിങ് ക്രിക്കറ്റ് സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ന്യൂസിലൻഡ് 34.3 ഓവറിൽ 108 റണ്ണിന് ഓൾഔട്ടായി. മറുപടി ബാറ്റ് ചെയ്ത ഇന്ത്യ 21-ാം ഓവറിൽ വിജയ റണ്ണെടുത്തു. ചൊവ്വാഴ്ച ഇൻഡോറിൽ നടക്കുന്ന പരമ്പരയിലെ അവസാനത്തേതും മൂന്നാമത്തേതുമായ ഏകദിനം അപ്രസക്തമായി.

ഷഹീദ് വീർ നാരായൺ സിങ് സ്റ്റേഡിയത്തിലെ കന്നി രാജ്യാന്തര ഏകദിനമാണു നടന്നത്. പിച്ചിൽ മുൻപരിചയമില്ലാതെയാണു ടീമുകൾ ഇറങ്ങിയത്. ടോസ് നേടിയ ഇന്ത്യൻ നായകൻ രോഹിത് ശർമയ്ക്ക് അതു കൊണ്ടു തന്നെ ആശയക്കുഴപ്പവുമുണ്ടായി.