കൊമ്പൻ കോഹ്ലി

ഒന്നാം ഇന്നിങ്സിൽ ഇന്ത്യ 571 ഇന്ത്യക്ക് 91 റൺ ലീഡ് കോഹ്ലിക്ക് സെഞ്ചുറി (186) സെഞ്ചുറി മൂന്നു വർഷത്തിനുശേഷം അക്സറിന് അർധസെഞ്ചുറി

അഹമ്മദാബാദ്: മൂന്നു വർഷത്തിനുശേഷം വിരാട് കോഹ്ലി മൂന്നക്കം കണ്ടെത്തിയ മത്സരത്തിൽ ഓസ്ട്രേലിയക്ക് എതിരെ ഇന്ത്യക്ക് ആദ്യ ഇന്നിങ്സ് ലീഡ്, ബോർഡർ ഗാവസ്കർ ട്രോഫി നാലാം ക്രിക്കറ്റ് ടെസ്റ്റിൽ ഓസ്ട്രേലിയയുടെ 480 റണ്ണിനു മറുപടി പറഞ്ഞ ഇന്ത്യ ഒൻപതു വിക്കറ്റിന് 571 റണ്ണടിച്ചു. പരുക്കേറ്റ ശ്രേയസ് അയ്യർ ബാറ്റ് ചെയ്യാൻ ഇറങ്ങിയില്ല. 91 റണ്ണിന്റെ കമ്മിയുമായി രണ്ടാം ഇന്നിങ്സിനിറങ്ങിയ ഓസ്ട്രേലിയ നാലാം ദിവസം കളി നിർത്തുമ്പോൾ വിക്കറ്റ് നഷ്ടപ്പെടാതെ മൂന്നു റണ്ണെന്ന നിലയിലാണ്. ഇന്ത്യയുടെ ഒന്നാംഇന്നിങ്സ് സ്കോറിനേക്കാൾ 88 റണ്ണിന് ഓസീസ് പിന്നിലാണ്. അപ്രതീക്ഷിതമായതൊന്നും സംഭവിച്ചില്ലെങ്കിൽ നാലാം ടെസ്റ്റ് സമനിലയിലാകും. എന്നാൽ, അഹമ്മദാബാദിലെ നരേന്ദ്ര മോദി സ്റ്റേഡിയത്തിലെ പിച്ച് സ്പിന്നിനെ അനുകൂലിക്കുന്ന ലക്ഷണങ്ങൾ പ്രകടിപ്പിച്ചു തുടങ്ങിയത് ഓസ്ട്രേലിയയ്ക്ക് അപായസിഗ്നൽ നൽകുന്നു; ഒപ്പം ഇന്ത്യക്ക് പ്രതീക്ഷയും.

ടെസ്റ്റിലെ 28-ാമത്തെയും രാജ്യാന്തര ക്രിക്കറ്റിലെ 75-ാമത്തെയും സെഞ്ചുറി കുറിച്ച് വിരാട് കോഹ്ലിയാണ് ഇന്നലത്തെ കളിയിലെ താരം. 364 പന്തിൽ 15 ഫോർ അടക്കം 186 റണ്ണാണ് കുറിച്ചത്. ഓസീസിനെതിരായ കോഹ്ലിയുടെ ഉയർന്ന ടെസ്റ്റ് സ്കോറാണിത്. 2014-ൽ എം.സി.ജിയിൽ നേടിയ 169 റണ്ണാണ് ചരിത്രത്തിൽ നിന്നു മാഞ്ഞത്. കരിയറിലെ എട്ടാമത് ഇരട്ട സെഞ്ചുറി പൂർത്തിയാക്കാനായില്ലെങ്കിലും ഇന്ത്യൻ ഇന്നിങ്സിന്റെ നട്ടെല്ലാകാൻ താരത്തിനായി.