ഇമ്രാൻ അറസ്റ്റിൽ, കലാപം

മുൻപ്രധാനമന്ത്രിയെ പിടികൂടിയതു കോടതിക്കുള്ളിൽനിന്ന് റാവൽപിണ്ടിയിലെ സൈനികകേന്ദ്രത്തിലേക്ക് പ്രതിഷേധക്കാർ ഇരച്ചുകയറി • പെഷാവറിൽ നിരോധനാജ്ഞ

ഇസ്ലാമാബാദ്: പാകിസ്താൻ മുൻ പ്രധാനമന്ത്രി ഇമാൻ ഖാൻ (70) അറസ്റ്റിൽ. അധികാരത്തിൽ നിന്നു പുറത്തായശേഷം നേരിടുന്ന നിരവധി കേസുകളിലൊന്നിൽ ഇസ്ലാമാബാദ് ഹൈക്കോടതി മുമ്പാകെ ഹാജരാകാൻ എത്തിയപ്പോഴാണ് ഇമ്രാനെ അർധസൈനികവിഭാഗം കസ്റ്റഡിയിലെടുത്തത്.

ഇമ്രാന്റെ ബയോമെട്രിക് വിവരങ്ങൾ ശേഖരിക്കുകയായിരുന്ന കോടതി മുറിയുടെ ചില്ലുവാതിൽ തകർത്ത് അകത്തുകടന്ന പോലീസ് അദ്ദേഹത്തെ വലിച്ചിഴച്ച് കൊണ്ടുപോകുകയായിരുന്നെന്നു പാകിസ്താൻ തെഹ്രീ ഇ ഇൻസാഫ് (പി.ടി.ഐ) പാർട്ടി ആരോപിച്ചു. അറസ്റ്റിനു പിന്നാലെ പാകിസ്താനിൽ വ്യാപക സംഘർഷം. പെഷാവറിൽ 30 ദിവസത്തേക്ക് നിരോധനാജ്ഞ പ്രഖാപിച്ചു. റാവൽപിണ്ടിയിലെ സൈനിക ആസ്ഥാനത്തേക്ക് പ്രതിഷേധക്കാർ ഇടിച്ചു കയറി. ലാഹോറിൽ മുതിർന്ന സൈനിക ഉദ്യോഗസ്ഥരുടെ വസതികൾക്കു മുന്നിലും പ്രതിഷേധക്കാർ തടിച്ചുകൂടി.