സ്വർണവിലയിൽ മികച്ച കുറവ്

ബോണ്ടിൽ തെന്നിവീണ് രാജ്യാന്തര വില

കൊച്ചി: വിവാഹ ആവശ്യത്തിനുൾപ്പെടെ ആഭരണം വാങ്ങാൻ ശ്രമിക്കുന്നവർക്ക് ആശ്വാസവുമായി സ്വർണവിലയിൽ ഇന്നലെ മികച്ച കുറവ്. പവന് 440 രൂപ കുറഞ്ഞ് വില 58,280 രൂപയായി. 55 രൂപ താഴ്ന്നിറങ്ങി 7,285 രൂപയിലാണ് ഗ്രാം വിലയുള്ളത്. അതേസമയം, രണ്ടാഴ്ച കൊണ്ട് പവന് 2,520 രൂപയും ഗ്രാമിന് 315 രൂപയും കൂടിയശേഷമാണ് ഇന്നലെ വില അൽപം കുറഞ്ഞത്. 18 കാരറ്റ് സ്വർണവിലയും ഇന്നലെ ഗ്രാമിന് 45 രൂപ കുറഞ്ഞ് 6,010 രൂപയായി.

റെക്കോർഡ് ഉയരത്തിൽ നിന്ന് വെള്ളിയും മെല്ലെ താഴെയിറങ്ങി. ഇന്നലെ വില ഗ്രാമിന് രണ്ടുരൂപ കുറഞ്ഞ് 105 രൂപ. രാജ്യാന്തര വിപണിയിലെ റെക്കോർഡ് വിലവർധന മുതലെടുത്ത് സ്വർണനിക്ഷേപ പദ്ധതികളിൽ നിക്ഷേപകർ ലാഭമെടുപ്പ് തകൃതിയാക്കിയത് വില കുറയാനിടയാക്കി.