ભક્તિ બની મોંઘીઃ ફૂલના ભાવ આસમાને ૧૫૦%નો ભાવ વધારો

સતત પડતાં વરસાદના કારણે ફૂલનો પાક ધોવાઈ ગયો

અમદાવાદ, સોમવાર

ગણેશોત્સવનો તહેવાર હવે પૂર્ણતાની નજીક છે,પરંતુ તહેવારની શરૂઆતે જ ફૂલના ભાવમાં બમ્પર ઉછાળો આવ્યો છે. જેના કારણે ભગવાનને અર્પણ થતાં ફૂલોની મહેક ફૂલોના પણ હવે મોંઘવારીના કારણે ફીકી પડી છે. હવે ભક્તિ કરવી પણ મોંઘી બની ગઈ છે. અત્યારે હિંદુ ધર્મના મહત્વના તહેવારોમાં ગણેશ ઉત્સવની ઉજવણી થઇ રહી છે. સાથે સાથે ભાવમાં સામાન્ય દિવસો કરતાં૧૫૦ ટકાનો વધારો થતાં લોકોને ભગવાનને ફૂલ ચડાવવાનું મોંઘું પડી રહ્યું છે. હારને બદલે માત્ર પુષ્પ અર્પણ કરી સંતોષ માનવો પડી રહ્યો છે. ફૂલનો વ્યવસાય કરતા વેપારીએ જણાવ્યું હતું કે, ગણપતિ ઉત્સવ અગાઉ ગુલાબનો ભાવ કિલોના ૧૫૦ રૂપિયા હતો, જે અત્યારે વધીને રૂ.૪૦૦ થયો છે. સૌથી વધુ ભાવ વધારો જૂઈનાં ફૂલમાં જોવા મળે છે. જૂઈનો ભાવ વધીને કિલોનાં રૂ.૨૨૦૦ થતાં કેટલાય નાના વેપારીઓ જૂઇને બદલે પીળા ગલગોટાનું વેચાણ કરવા મજબૂર બન્યા છે.