હની ટ્રેપ: મહિલા ભાડુઆતના બ્લેકમેઇલિંગથી કંટાળી મકાન માલિકે મોતને વહાલું કર્યું

મકાન માલિકે ભાડુઆત મહિલા અને તેના પતિને પાંચ લાખ રૂપિયા આપ્યા છતાં તેઓ મકાન પચાવી પાડવા રેપના કેસમાં ફસાવવાની ધમકી આપતાં હતાં

અમદાવાદ, શુક્રવાર 

લોકોને હનીટ્રેપમાં આજકાલ ફસાવીને રૂપિયા પડાવી લેવાના અનેક કિસ્સાઓ સામે આવી રહ્યા છે. લોકો હનીટ્રેપનાં ચક્કરમાં એવા ફસાઈ જાય છે કે તેમનું જીવન ઝેર બની જાય છે અને સમાજમાં આબરૂ જવાની બીકે લોકો આત્મહત્યા પણ કરી લેતા હોય છે. આવો જ એક કિસ્સો કૃષ્ણનગરના ઠક્કરનગરમાંથી સામે આવ્યો છે. ભાડુઆતે મકાન માલિકને હનીટ્રેપમાં ફસાવીને પાંચ લાખ રૂપિયા પડાવી લીધા હતા. ભાડુઆત મહિલા મકાન પચાવી લેવા માટે રેપ કેસમાં ફસાવી દેવાની ધમકી આપતી હોવાથી મકાન માલિકે આપઘાત કરી લેતાં ચકચાર મચી જવા પામી છે.

ઠક્કરનગરમાં રહેતાં સપનાબહેન (નામ બદલ્યું છે) એ રેખાબહેન પ્રજાપતિ, રમેશભાઈ પ્રજાપતિ, અને ધવલ પ્રજાપતિ વિરુદ્ધ કૃષ્ણનગર પોલીસ સ્ટેશનમાં ફરિયાદ નોંધાવી છે.

સપનાબહેનના પતિ હેર કટિંગ સલૂન ચલાવતા હતા સપનાબહેનને પુષ્પરાજ ખાતે પોતાની માલિકીનું મકાન છે. આ મકાન તેમણે છેલ્લા દોઢ વર્ષથી રેખાબહેન પ્રજાપતિ તેમજ તેમના પતિ અને દીકરાને આપ્યું છે.