ગરબા રમ્યા પછી ટેસ્ટી નાસ્તો તો જોઈએ જ!: ખાણી-પીણીના ધંધામાં જોરદાર તેજી

રાત્રે ૧૨.૦૦ વાગ્યા બાદ નાસ્તાનાં આઉટલેટ, ખાણી-પીણી બજારમાં ખેલૈયાઓની ભારે ભીડ

અમદાવાદ, શનિવાર

શહેરમાં નવલી નવરાત્રિના તહેવારનો માહોલ પુરબહારમાં જામ્યો છે. નવરાત્રિમાં શેરી ગરબા સાથે પાર્ટી પ્લોટમાં ખેલૈયાઓ ધુમ મચાવી રહ્યા છે. ગરબા પછી નાસ્તો કરવાનો ટ્રેન્ડ શહેરમાં જોવા મળી રહ્યો છે. ખાણીપીણીના ધંધામાં પણ તેજી આવી છે અને પાણીની નાની બોટલ જેવી સામાન્ય ચીજવસ્તુના ભાવ પણ બમણા થઈ ગયા છે. સોસાયટીમાં યોજાતા શેરી ગરબા કે પછી પાર્ટી પ્લોટમાં ગરબાની જામતી રમઝટ આ બધું પૂરું થયા બાદ ખેલૈયાઓને નાસ્તો ના કરે તો અધૂરું અધૂરું લાગે છે. આથી શહેરીજનો ગરબા રમ્યા પછી રાત્રે ૧૨.૦૦ વાગ્યા બાદ નાસ્તાનાં આઉટલેટ, લારીઓ કે પછી સોસાયટીમાં મહારાજ પાસે બનાવવામાં આવેલા નાસ્તા કે મોંઘી હોટલના કોફી શોપમાં ઊમટી પડે છે અને અલગ અલગ વાનગીઓની લહેજત માણીને જ ઘરે જાય છે.