AMC તૈયારઃ આદર્શ આચારસંહિતાના અમલીકરણ માટે કંટ્રોલરૂમ શરૂ કરાયો

સર્વોચ્ચ લેખાતી સ્ટેન્ડિંગ કમિટીમાં પણ આજે માત્ર એક જાણવાજોગ દરખાસ્ત

અમદાવાદ, ગુરુવાર

ભાજપ શાસિત મ્યુનિસિપલ કોર્પોરેશનના સત્તાવાળાઓ દ્વારા વિધાનસભાની ચૂંટણી દરમિયાન મુકાતી આદર્શ આચારસંહિતાની અમલવારી માટે છેક તા. ૧ નવેમ્બરથી તૈયારી આરંભાઈ હતી. તંત્રે તે દિવસે ખાસ પરિપત્ર બહાર પાડીને કંટ્રોલરૂમ શરૂ કર્યો છે. નવરંગપુરાના મલ્ટિલેવલ પાર્કિંગ ખાતેના ખાસ મ્યુનિ. કંટ્રોલરૂમમાં ફક્ત ચૂંટણીલક્ષી નિયમોના ઉલ્લંઘન અંગેની બાબતો પર ધ્યાન કેન્દ્રિત કરાશે અને શહેરમાં ચૂંટણીની આચારસંહિતાનું કડકાઈથી પાલન થાય તે દિશામાં આજથી જ કડક હાથે કામ લેવાશે. અત્રે ઉલ્લેખનીય છે કે આજે કેન્દ્રીય ચૂંટણીપંચ તરફ દ્વારા રાજ્યમાં ચૂંટણીનો કાર્યક્રમ જાહેર કરાયો હોઈ આજથી અમદાવાદ સહિત રાજ્યભરમાં ચૂંટણી આચારસંહિતા અમલમાં મુકાઈ ગઈ છે.