કોલ્ડ વેવ રિટર્ન્સ: વહેલી સવારથી ઠંડીનું આગમન, શહેરીજનો થથર્યા

આગામી ૪૮ કલાકમાં તાપમાનનો પારો વધુ ગગડશેઃ રાજ્યમાં કાતિલ ઠંડીનો ચમકારો જોવા મળશે

અમદાવાદ, બુધવાર

શિયાળાની ધીમી શરૂઆત બાદ માગશર માસના ગણતરીના દિવસો બાકી રહ્યા છે ત્યારે અચાનક આજે ઠંડીનો ચમકારો જોવા મળ્યો છે. વહેલી સવારના ઠંડીના થથરાટે શહેરીજનોને આજે ફરી સ્વેટર પહેરતા કર્યા છે. તેમ છતાં અત્યાર સુધી છેલ્લા કેટલાક દિવસોથી ગુજરાતમાં ઠંડીની તંગી વર્તાઈ હતી, જાણે કે ઠંડી ગાયબ થઇ ગઈ હતી. લોકો ભરશિયાળાની ઋતુમાં ઉનાળાની ગરમીનો અહેસાસ કરી રહ્યા હતા, તેમાં આજે વાતાવરણમાં અચાનક આવેલા પલટા બાદ ઠંડી અનુભવાઈ છે, જેના કારણે શહેરીજનો ખુશ છે.