રોગચાળો વકર્યો: શરદી-ઉધરસ અને તાવથી પીડાતા દર્દીઓની સંખ્યામાં જોરદાર ઉછાળો

સરકારી હોસ્પિટલ, આરોગ્ય કેન્દ્રો તથા ખાનગી દવાખાનાંમાં દર્દીઓની ભારે ભીડ

અમદાવાદ, ગુરુવાર

શહેરમાં શિયાળાની ઠંડી હવે બરાબર જામી છે. ઠંડા પવન ફૂંકાવાની સાથે ઠંડીનો અહેસાસ થતાં શહેરીજનોએ ગરમ કપડાં પહેરવાનું શરૂ કર્યું છે ત્યારે પહેલા એક સપ્તાહમાં ઉનાળા જેવા વાતાવરણ અને હવે ઠંડીના વાતાવરણમાં બીમારીએ પણ દસ્તક દીધી છે. વારંવાર બદલાતા વાતાવરણ અને બેવડી ઋતુના અહેસાસ વચ્ચે લોકો તાવ, શરદી, ઉધરસથી પીડાઈ રહ્યા છે.

શહેરનાં આરોગ્ય કેન્દ્રો, ખાનગી દવાખાનાં અને સરકારી હોસ્પિટલમાં સારવાર માટે દર્દીઓનો ધસારો વધી રહ્યો છે. ખાનગી દવાખાનાં અને શહેરની સરકારી હોસ્પિટલોમાં દર્દીઓની લાઈનો લાગી રહી છે. શહેરમાં પ્રથમ મિશ્ર ઋતુ અને હવે કડકડતી ઠંડીના લીધે તાવ, શરદી અને ઉધરસના દર્દીઓની સંખ્યામાં નોંધપાત્ર વધારો થઈ રહ્યો છે.