સાવધાન: અમદાવાદમાં કોરોનાનો ખતરો ફરી સતત વધતો જાય છે

ગઈ કાલે નવા ર૬ કેસ નોંધાયા અને માત્ર ૧૯ લોકો વેક્સિનેટેડ થયા

અમદાવાદ, સોમવાર

શહેરમાં ફરીથી કોરોનાએ માથું ઊંચક્યું છે. આ કોરોના હળવાં લક્ષણ ધરાવતો હોઈ મોટા ભાગના લોકો ઘરે રહીને સારવાર મેળવી રહ્યા છે, જોકે તબીબોએ જાહેર સ્થળોએ માસ્ક પહેરવાની અને સોશિયલ ડિસ્ટન્સિંગ જાળવવા જેવી કોરોનાની ગાઈડલાઈન પાળવાની સલાહ આપી છે. અમદાવાદમાં કોરોનાના સતત વધતા કેસથી મ્યુનિ. તંત્ર પણ હરકતમાં આવ્યું છે.

માર્ચ મહિનાના પ્રારંભથી અમદાવાદમાં કોરોનાના કેસ જોવા મળી રહ્યા છે. અગાઉની કોરોનાની મહામારી વખતે જેમ અમદાવાદ ગુજરાતમાં કેસના મામલે હોટ સ્પોટ બન્યું હતું તેવી જ રીતે હવે પણ અમદાવાદ કોરોનાના કેસમાં રાજ્યમાં હોટ સ્પોટ બન્યું છે.