પોલીસનો ભરતી મેળો: ૧૨,૪૭૨ જગ્યાઓ માટે દસ લાખ ઉમેદવારો પોતાનું ભવિષ્ય અજમાવશે

પોલીસ ભરતી પ્રક્રિયાની શરૂઆત અડધો કલાક મોડી થઈઃ શાહીબાગ અને તરોડા ગ્રાઉન્ડ પર ઉમેદવારોએ શારીરિક કસોટી આપી

અમદાવાદ સહિત ગુજરાતનાં ૧૫ પરીક્ષા કેન્દ્રો પર આજથી પોલીસનો ભરતી મેળો શરૂ થઇ ગયો છે. દસ લાખથી વધુ ઉમેદવારોની પ્રેક્ટિકલ પરીક્ષાનો આજથી પ્રારંભ થઇ ગયો છે, જેમાં ૧૨,૪૭૨ લોકો જ ખાખી પહેરશે. ઉમેદવારો વહેલી સવારે કડકડતી ઠંડીમાં જ પરીક્ષા કેન્દ્રો પર પહોંચ્યા હતા અને દોડ લગાવી હતી. મહિલા ઉમેદવારોની સાથે તેમના વાલીઓ પણ પરીક્ષા કેન્દ્રની બહાર હાજર જોવા મળ્યા હતા. પરીક્ષા કેન્દ્ર પર સફળ થયેલા ઉમેદવારોમાં ખુશીનો માહોલ, જ્યારે નિષ્ફળ થયેલા ઉમેદવારો નિરાશ જોવા મળ્યા હતા, જોકે આ સમયે અન્ય ઉપસ્થિત પરિવારજનો અને ઉમેદવારો એકબીજાને દિલાસો આપતા જોવા મળ્યા હતા. ચોંકાવનારી વાત એ છે કે આજે અડધો કલાક મોડો પોલીસ ભરતી મેળો શરૂ થયો હતો.