ચૈત્ર મહિનામાં જ કેમ પીવામાં આવે છે લીમડાનો રસ?

ચૈત્ર મહિનાના પહેલા આઠ દિવસમાં લીમડાનાં દસ કુમળાં પાન, મુઠ્ઠીભર ફૂલ, બે કાળાં મરી, હિંગ, સિંધવ, જીરું અને અજમો મિક્સ કરીને તેનો રસ પીવાથી આખું વરસ નીરોગી રહેવાય છે

ચૈત્ર મહિનો એટલે વસંતઋતુનો ઉત્તરાર્ધ. આ મહિનામાં લીમડાના વૃક્ષ પર મોર આવે છે. આયુર્વેદમાં જણાવ્યા પ્રમાણે આ મહિનામાં મોરનો ઉપયોગ ઔષધિ તરીકે કરવામાં આવે છે. કેટલાક લોકો લીમડાના મોરનો રસ કરીને પીએ છે તો કેટલાક લોકો લીમડાનાં કુમળાં પાનનો રસ પીએ છે. તમે બંને વસ્તુ ભેગી કરીને તેનો રસ પી શકો છો.

ચૈત્ર મહિનાના પહેલા આઠ દિવસમાં લીમડાનાં દસ કુમળાં પાન, મુઠ્ઠીભર ફૂલ, બે કાળાં મરી, હિંગ, સિંધવ, જીરું અને અજમો મિક્સ કરીને તેનો રસ પીવાથી આખું વરસ નીરોગી રહેવાય છે. ચૈત્રમાં લીમડાના વૃક્ષ પર જે ઝીણાં ફૂલ એટલે કે મોર બેસે છે તેને અને લીમડાનાં કૂણાં પાનને સર્વરોગ પરિહારક માનવામાં આવે છે.

પહેલાંના જમાનામાં તો દાતણ કરવા માટે પણ લીમડાની ડાળી વપરાતી હતી, એનાથી દાંતમાં સડો થતો ન હતો. રોજ આ નિયમ રાખવાથી દાંતની તકલીફો આવતાં પહેલાં જ અટકી જાય છે.

કડવો રસ પેટમાં ઊતરે તો પાચન પણ સુધરે છે. આ પ્રયોગથી ઉનાળામાં જોવા મળતી અળાઈ, ફોલ્લી અને ગૂમડાં સામે પણ રક્ષણ મળે છે.