તલાટીની પરીક્ષા માટે ચુસ્ત સુરક્ષા વ્યવસ્થા કાલે ૮.૬૫ લાખ ઉમેદવારોનાં ભાવિનો ફેંસલો

૨૬૯૪ કેન્દ્ર પર તમામ ઉમેદવારની કોલ લેટર સાથે વીડિયોગ્રાફી કરાશેઃ ગેરરીતિ સામે આવશે તો નવા કાયદા પ્રમાણે કાર્યવાહી કરાશે

અમદાવાદ, શનિવાર

અમદાવાદ સહિત રાજ્યભરમાં રવિવારે આવતી કાલે તલાટી-કમ-મંત્રીની પરીક્ષા યોજાવાની છે. આ પરીક્ષા માટે રાજ્યમાં ૮.૬૫ લાખ જેટલા ઉમેદવારો પરીક્ષા આપવાના છે. તલાટીની ૩૪૩૭ જેટલી જગ્યા માટે આ ભરતી ચાલી રહી છે. દરેક ઉમેદવાર પરીક્ષા કેન્દ્રમાં પ્રવેશ કરે ત્યારે ઉમેદવારની કોલ લેટર સાથે વીડિયોગ્રાફી કરવામાં આવશે. આ ઉપરાંત અસામાજિક તત્ત્વો સામે ચાંપતી નજર રાખવામાં આવશે. જો ગેરરીતિ સામે આવશે તો નવા કાયદા પ્રમાણે કાર્યવાહી કરવામાં આવશે. આ ઉપરાંત પેપરની સલામતી માટે પૂરતો પોલીસ બંદોબસ્ત ગોઠવવામાં આવ્યો છે. પરીક્ષા કેન્દ્રમાં પ્રવેશ સમયે ઉમેદવારના કોલ લેટરની તપાસ કરવામાં આવશે.