મિત્ર રૂપિયા લઈ નાસી ગયો તો વ્યાજખોરે જામીનદાર બનેલા યુવક પર છરી હુલાવી

યુવકે રૂપિયા ચૂકવી દેવાની બાંયધરી આપી હતીઃ વ્યાજખોરોએ યુવકને દોડાવી દોડાવીને માર માર્યો

અમદાવાદ, શુક્રવાર 4

શહેરના અમરાઇવાડી વિસ્તારમાં રૂપિયાની લેતી દેતી મામલે ચાર શખ્સોએ યુવકને દોડાવી દોડાવીને માર્યા બાદ છરી વડે હુમલો કરતાં મામલો બીચક્યો છે. યુવકના મિત્રને રૂપિયાની જરૂર હોવાથી તેણે વ્યાજનો ધંધો કરનાર શખ્સ પાસેથી રૂપિયા અપાવ્યા હતા.

મિત્ર રૂપિયા ના ચૂકવે તો યુવક તે રૂપિયા ચુકવશે તેવી બાંયધરી લઇને જામીનમાં રહ્યો હતો. મિત્ર રૂપિયા લઇને નાસી જતાં હવે યુવકને રૂપિયા ચૂકવવાનો વારો આવી ગયો હતો. જેથી વ્યાજખોર શખ્સે તેની પાસે ઉઘરાણી શરૂ કરી દીધી હતી. યુવકે સમયસર રૂપિયા નહીં આપતાં ગઇ કાલે શખ્સે તેના સાગરીતો સાથે રહીને હુમલો કર્યો હતો.