રોડ પર કચરો નાખ્યો તો આવી બન્યું: AMCએ એક સપ્તાહમાં ૧૭.૭૮ લાખથી વધુનો દંડ વસૂલ્યો

શહેરમાંથી ૫૬૫ કિલોથી પણ વધુ પ્રતિબંધિત પ્લાસ્ટિકનો જથ્થો જપ્ત કરાયો

અમદાવાદ, ગુરુવાર

મ્યુનિસિપલ કોર્પોરેશનના સોલિડ વેસ્ટ મેનેજમેન્ટ વિભાગ દ્વારા શહેરને સ્વચ્છ રાખવાની ઝુંબેશ અવિરતપણે ચલાવાઈ રહી છે, જે હેઠળ જાહેર રોડ પર ચો નાખી ગંદકી કરનારા દુકાનદારો સામે તંત્રએ લાલ આંખ કરીને ૧૨થી ૧૮ જુલાઈ દરમિયાનના એક અઠવાડિયાના સમયગાળામાં જ રૂપિયા ૧૭.૭૮ લાખથી વધુનો વહીવટીચાર્જ વસૂલ્યો હોવાની વિગતો જાણવા મળી છે.

તંત્ર દ્વારા શહેરના સાતેય ઝોનમાં રોજેરોજ સોલિડ વેસ્ટ મેનેજમેન્ટની વોર્ડ લેવલની ટીમ દ્વારા જાહેર રોડ પર કચરો ફેંકનારા ધંધાર્થીઓનું સઘન ચેકિંગ કરાય છે. આ ચેકિંગ દરમિયાન જો કોઈ ધંધાર્થી કસૂરવાર ઠરે તો તેની પાસેથી રૂ. ૨૫,૦૦૦ સુધીનો આકરો દંડ વસૂલવામાં આવે છે. આ ઉપરાંત આવા ધંધાર્થીઓના એકમોને તાળાં મારતાં પણ તંત્ર અચકાતું નથી.