તથ્ય અકસ્માત કાંડની શાહી સુકાઈ નથી ત્યારે મણિનગરમાં દારૂડિયાએ કાર પલટી મારી દીધી

કાર બાંકડા સાથે અથડાતાં પલટી ખાધીઃ કારમાંથી બિયરની બોટલો મળી, કારને જોતાંની સાથે જ બાંકડા પર બેઠેલા લોકો ઊભા થઈ ગયા

અમદાવાદ, સોમવાર

ઇસ્કોનબ્રિજ પર થોડા દિવસ પહેલાં જેગુઆર કારના ચાલક તથ્ય પટેલે કરેલા ગોઝારા અકસ્માતની શાહી હજુ સુધી સુકાઇ નથી ત્યારે મોડી રાતે મણિનગર વિસ્તારમાં પુરઝડપમાં આવી રહેલી કારે એકાએક પલટી ખાતાં ચકચાર મચી ગઇ છે. સ્થાનિકોએ કારચાલકને ઝડપી પોલીસના હવાલે કર્યો છે ત્યારે ચોંકાવનારી વાત એ છે કે કારમાંથી બિયરની બોટલો મળી આવી છે. કારચાલક યુવકે તેના ત્રણ મિત્રો સાથે બિયરની પાર્ટી કરી હતી. પાર્ટી કર્યા બાદ યુવક ત્રણેય મિત્રોને ઘરે મૂકીને પોતાના ઘર તરફ જતો હતો ત્યારે આ દુર્ઘટના બની હતી. યુવક વિરુદ્ધ ‘જે' ડિવિઝન ટ્રાફિક પોલીસ સ્ટેશનમાં ડ્રિન્ક્સ એન્ડ ડ્રાઇવનો ગુનો દાખલ થયો છે, જ્યારે દારૂ ઢીંચવા તેમજ કારમાં રાખવાના મામલે યુવક તેમજ તેના મિત્રો વિરુદ્ધ મણિનગર પોલીસ સ્ટેશનમાં ગુનો દાખલ થયો છે.