શા માટે મનાવાય છે વિશ્વ વાઘ દિવસ?

દુનિયાની કુલ વાઘની વસ્તીના ૭૫ ટકા માત્ર ભારતમાં જોવા મળે છે. હવે દુનિયાના માત્ર ૧૩ દેશમાં જ વાઘ બચ્યા છે. એક સમયે એક લાખથી વધુ વાઘ ધરાવતા વિશ્વમાં આજે માત્ર ૪૫૦૦ વાઘ છે

૨૯ જુલાઇનો દિવસ છેલ્લાં ૧૩ વર્ષથી આંતરરાષ્ટ્રીય વાઘ દિવસ તરીકે મનાવવામાં આવે છે. વૈશ્વિક સ્તર પર વાઘના રક્ષણ અને તેમની લુપ્ત થતી પ્રજાતિને બચાવવા માટે જાગૃતિ ફેલાવવી એજ આ દિવસનો મુખ્ય હેતુ છે. વર્લ્ડ ટાઈગર દિવસની શરૂઆત વર્ષ ૨૦૧૦માં થઈ હતી. જેને રશિયામાં સેન્ટ પીટર્સબર્ગ ટાઈગર સમિટે માન્યતા આપી હતી. ત્યારે એક રિપોર્ટમાં ૯૭ ટકા વાઘ ગાયબ થવાની માહિતી સામે આવતા દુનિયાભરના લોકો આશ્ચર્યમાં મુકાયા હતા અને દુનિયામાં માત્ર ૩૯૦૦ જ વાઘ બચ્યા હતા.

આ સમિટમાં વાઘની વસ્તી વાળા ૧૩ દેશોએ ભાગ લીધો હતો, તે સમયે વાઘની સંખ્યાને બેગણી કરવાનું લક્ષ્ય રાખવામાં આવ્યુ હતુ. એ લક્ષ્ય તો કદાચ સિદ્ધ થઇ શક્યું નથી, પરંતુ વાઘની સંખ્યા વધારવાના પ્રયાસો ચાલુ છે. તેમાં થોડી ઘણી સફળતા મળી છે.